Ta ntŭk kan hành chính nsum xă Hòa Phú, n’gor Dak Lak, ăp nar bôk khay 7 lĕ geh âk nuĭh ƀon lan tât ƀư ăp samƀŭt hành chính. Lôch jêh mbơh tơih samƀŭt rhăch nău trực tuyến n’hanh sŏk phiêu jêh ƀư, wa Nguyễn Thế Lâm, ta thôn 9, xă Hòa Phú, nkoch, bôl lah ăp nar bôk năp pah kan tĭng ntrong ƀư mhe yơn lĕ geh âk nău rgâl dŭt uĕh tâm nău ƀĭt joet mkra ăp sam ƀŭt hành chính.

Nău uĕh ngăn lah gâp saơ êng đah bah năp, nĕ lah bah năp đaơ an kâp, jêh nĕ ăp samƀŭt âk ir jêh nĕ rgâl ntŭk aơ, rgâl ntŭk ri yơn aƀaơ bơi kơt rgâl mrô dôl saơ tâm nău kan, tĭng nău kan ăp nar bah he. Kơt dŏng mrô ri samƀŭt dơi mkra lah ngăch dơh n’hanh săk rnglăy âk.

Tâm ban ma nĕ, ta Ntŭk kan hành chính nsum phường Buôn Ma Thuột, n’gor Dak Lak, nuĭh ƀon lan dăp nuĭh gay sŏk mrô ƀư ăp samƀŭt hành chính. Wa Vũ Đức Hưởng, ta phường Ea Kao, n’gor Dak Lak an gĭt, bôl gĭt nar aơ n’gâng kan ƀon lan 2 gưl na nê̆ an dŏng, ăp samƀŭt dơi ƀư na nê̆ ta phường ntŭk nơm gŭ, yơn yor bên jêng wa hôm tât ntŭk kan hành chính ơm bah nkual ƀon têh Buôn Ma Thuột bah năp đaơ gay ƀư ăp samƀŭt. Wa dŭt ŭch yor ăp samƀŭt dơi rgâl mrô, bah nău sŏk mrô tĭng rơh tât rnôk nuĭh kan wơt dơn samƀŭt rhăch nău, mplơ̆ jêh samƀŭt.

Gâp hăn ta aơ gay rgâl samƀŭt kơp dơn dŏng neh. Yor ntŭk aơ lĕ ƀư bên hôm n’hanh bu ƀư dŭt ngăch jêng gâp tât ta aơ ƀư. Lah nsum nău ngơi hôm e ơm đêt, nău kan pơng m’ha yơn mbrơi mbrơi mbra bên. Bah kơi aơ dơi cán bộ ntĭm ri he gĭt lah ntŭk gŭ ƀư ntŭk nĕ dơh lơn. Hôm aƀaơ mhe nar bôk năp ri gâp tât ntŭk ơm gay ƀư samƀŭt dơm.

Ăp nar bah năp, lĕ rngôch nuĭh ƀon lan tât ăp ntŭk kan hành chính nsum ta ăp xă, phường ta Dak Lak gay ƀư tĭng ăp samƀŭt hành chính ŭch khlay, kơt: khai sanh, samƀŭt khĭt ôm, bảo hiên y tế, dăn lăp nti, uănh năl ntŭk gŭ, samƀŭt dăn dŏng neh ntu... Gay ntop kơl nuĭh ƀon lan, cán bộ, nuĭh kan ta ntŭk kan hành chính lĕ nsrôih gĭt tât, ƀư bên đah trong dŏng nsum tâm ƀĭt joet n’gâng kan ƀon lan 2 gưl.

Wa Nguyễn Đăng Huy, nuĭh kan Ntŭk kan hành chính nsum xă Hòa Phú, n’gor Dak Lak nkoch, bah rnôk pơk rlong dŏng ntrong ƀư mhe, ăp cán bộ, nuĭh kan ntŭk kan bơi mô geh rlu. Lĕ rngôch nău kan  tât măng gay rĭng tâm ban ăp dữ liệu, ƀĭt joet du trong uĕh lơn, tâm di nău ŭch bah nuĭh ƀon lan.

Lĕ rngôch ăp nuĭh kan pah kan ta Ntŭk kan hành chính nsum xă Hòa Phú mhe tât bah âk nuĭh cán bộ jêng nău uănh joi, gĭt, pơk dŏng trong rlong lor ri ntơm đăp mpăn yơn rnôk lăp pơk dŏng bah ôi tât mông ri geh âk nău kơt dữ liêụ geh tât trong samƀŭt hành chính hôm mhe jêng nău uănh joi, mkra mâp jêr jŏt, yơn oh nô dôl dŭt nsrôih mkra.

Ta ăp xă, phường ta n’gor Dak Lak tâm ăp nar aơ, ăp rmôt way kan phần mềm n’hanh nuĭh kan kỹ thuật bah Viễn thông Dak Lak (VNPT) na nê̆ ntop kơl cán bộ viên chức pơk dŏng nău rhŏ nsum kơt ntop kơl nuĭh ƀon lan tât ƀư samƀŭt.

Tĭng wa Nguyễn Nam Quốc, Giám đốc Viễn thông Dak Lak, ntŭk kan ntop kơl ăp ndoh ndơ dữ liệu kơl nuĭh ƀon lan dơi ƀư ăp nău rhŏ kan hành chính nsum trực tuyến. Đah n’gor Dak Lak mhe, nău tiăr nti, ntĭm cán bộ, nuĭh kan ăp ntŭk kan xă, phường tâm nău dŏng trong nsum lĕ dơi ƀư bah năp lor, lơn lah đah ăp xă, phường mpeh tâm n’gor Phú Yên bah năp đaơ, gay rnôk rgâl dŏng trong nsum mhe ri khân pơng dơi tŏng dâl ntŭk kan. Wa Nguyễn Nam Quốc an gĭt:

Kơt ta n’gor Dak Lak, du ntŭk xă phường ri dơi pă đêt ngăn 2 chuyên viên mpeh phần mềm n’hanh du hê nuĭh kan kỹ thuật gay an ntop kơl, mô an du ntil nău geh kơt mô dơi tâm ôp tâm mâp, roh boăt nthoi ngih wâl ta ăp ntŭk rhŏ an nuĭh ƀon lan. Rlău ma nĕ VNPT Dak Lak dôl ndâk njêng ăp group ntop kơl ngăch n’hanh ăp mrô hotline gay lĕ rngôch ăp ntŭk ma rnôk geh du ntil nău mpeh boăt nthoi ntung trong ngih wâl, kơt nu nău rhŏ an nuĭh ƀon lan geh nking n’gang ri mbra dơi ntop kơl ngăch ngăn”.