Bôk nau kan ntĭm nti phổ phông năm 2018 geh ntrŭnh ntơm năm 2020-3031 đah kon se jrâu 1, ntơm năm nti 2021-2022 đah kon se jrâu 2 ndrel jrâu 6, ntơm năm nti 2022-2023 đah kon se jrâu 3, jrâu 7 ndrel jrâu 10. Ta n’gor Dak Lak, bah bơi tât 3 năm ƀư, ndrel nau jêr mpeh rgâl săm ƀŭt ntĭm, rgâl nau ntĭm, ăp ngih săm ƀŭt mô vĭ vĕ tâm nau mô tŏng ngih nti, nai ntĭm kon se.

Ntơm năm nti bôk năp nti năm 2018, Dak Lak lah ngoai tâm ăp n’gor geh nau khuch yor srê Covid-19. Kơt lah rnôk aơ, kon se nti trực tuyến. Ndri ma, lăp năm mhe mhe, ăp ngih săp ƀŭt roh âk mông nar gay ma ntĭm nti tay ân kon se, nkre nai nti nchrăp êng nau ntĭm nti ân tâm di đah nau ntĭm nti mhe. Wa Phạm Xuân Mỹ, Hiệu trưởng ngih săm ƀŭt Phổ thông Dân tộc Nội trú THCS Nkuăl Krông Pách, ngơi:

‘Geh tât nau kan ntĭm nti lah nau ân geh ndâk nau ntĭm nti geh âk nau nkoch mbơh, nau aơ ngih săm ƀŭt hŏ rđau ăp rmôt ƀư nau kan gay tâm nchră tâm ban, săch nau ntĭm nti ân nai ntĭm mbơh ân rjăp bah ăp nau ntĭm nti tĭng môn ntĭm ndrel nti ma ndrom săm ƀŭt mhe mô lah ăp ntil nau ntĭm mbơh mhe geh đă ƀư”.

Ngoai tâm ăp nau đă rnôk ntrŭnh ƀư Bôk nau ntĭm nti mhe lah ƀư ntĭm nti tâm lôch du nar, ngăn lah kon se ntơm jrâu 1-5. Yơn lah, âk nkuăl tâm n’gor Dak Lak hôm nau mô tŏng ngih săm ƀŭt, mô tŏng jrâu nti, ndơ dŏng ê tâm ban tĭng nau đă. Nai Hoàng Thị Cúc, nai ntĭm kon se ngih săm ƀŭt Trần Quốc Toản, nkuăl têh Ea Pôk, nkuăl Cư M’gar, ngơi:

 ‘Tâm nau ntĭm nti mbơh geh ăp ntil ndơ dŏng ân nai nti kon se, ma ta apơ ri rnôk ntĭm ngăn hên mô geh. Hên knŭng ntĭm dơm ma mbŭng, uănh tâm săm ƀŭt mbơh đă ri đă ân kon se uănh tâm nê dơm. Ndri ma du tiết ntĭm nti kơt nê ri 3-4 âm kon se mơ nti âm aơ lŏ tât âm êng ri jêr ngăn ân ăp kon se, hôm ân kon se ntĭm nti ân blau ngăn ri nai ntĭm mô năn”.

Êp nê, nau mô tŏng nai nti kon se kŏ dôl lah nau jêr đah n’gâng kan ntĭm nti Dak Lak. Nau ntĭm nti ăp mon rgum nsum rgâl ma ăp môn nti êng kơt ntơm nơh, ri aơ kŏ lah nau ƀư kon se vĕ vĕ, ngăn lah nti nti kon se tâm gưl ntơm jrâu 5-9. Wa Phạm Ngọc Lĩnh, Hiệu trưởng Ngih săm ƀŭt THCS Ea Tul, Xã Ea Tul, nkuăl ƀon têh Buôn Ma Thuột, n’gor Dak Lak, ngơi:

“Rmôt nai ntĭm nti bah ngih săm ƀŭt mô tŏng, ri ma du đê̆ bộ môn ân geh pă ntĭm ri hôm jêr. Nau tal 2, ăp môn geh rgum kơt môn khoa học tự hiên ri rnôk aơ ê geh nau nti kon se ƀư du ntil ma geh ƀư tâm nau ntĭm nti bah 3 nai nti rgum nsum nê lah ăp nai nti Hoá học, lịch sử, kon se kŏ kơt lah môn nti lịch sử địa lý ri rnôk aơ ê geh nai nti êng ma geh 2 nai nti mô lah nai nti lịch sử nti địa lý mô lah nai nti địa lý ntĭm môn lịch sử”.

Tĭng n’gâng kan ntĭm nti n’gor Dak Lak, rnôk aơ lam n’gor mô tŏng 1.200 nai ntĭm, nŭih ntĭm tĭng nau ntrŭnh, rnoh jrâu nti mhe tŏng dơi nau đă ntĭm lôch du nar bơi tât 500 jrâu. Ăp nau mô tŏng aơ khuch ngăn tât nau ngăch kŏ kơt lah nau nâp bah nau ƀư ntĭm nti năm 2018 bah n’gor. Ăp ngih săm ƀŭt nsôih ntĭm ndrel nti tĭng nau dơi ngăn lor ma geh n’gor mbơh nau dơi mpeh ntŭk ntu ndrel ndơ dŏng tĭm nti bah ăp nai./.