Lơ 14/1, ta nkâl ƀon têh Buôn Ma Thuột, Ban ntĭm rđău yŭr mham ŭch êng n’gor Dak Lak tâm rgop đah ăp ntŭk kan ƀư bôk nău kan yŭr mham ŭch êng năng pơh chăng. Ntơm bah ôi ơm, lưĕ geh rlău 1.000 nuĭh dăn râng yŭr mham. Tă bah nĕ, mpôl rdâk ƀư lĕ wơt dơn 622 đơn vị mham. Wa Ayun H Hương, Kruanh Hội chữ Thập đỏ, Groi kruanh Ban ntĭm rđău yŭr mham ŭch êng n’gor Dak Lak an gĭt, lĕ rngôch rnoh mham dơi geh mbra dơi njuăl tât ngih dak si đa khoa nkual Tây Nguyên gay rhŏ săm ndal n’hanh săm nuĭh ji, ngăn lah tâm rơh Tết nguyên đán êp tât.

Bôk nău kan Năng pơh chăng ta Dak Lak năm aơ mbra ƀư ta 5 ntŭk lah: Tach ndeh păr Buôn Ma Thuột, nkual têh Buôn Hồ n’hanh ăp nkuăl Krông Pắc, Cư M’gar, Krông Năng. Ta năp nĕ, tâm ăp nar 4 n’hanh 5/1 mhe rlău, bôk nău kan ƀư ta Tach ndeh păr Buôn Ma Thuột n’hanh nkuăl Krông Pắk lĕ wơt dơn geh 620 đơn vị mham.