Pah kan n’hŭch ach o năm 2023 ta n’gor Dak Nông hŏ geh mbơm oi n’hanh leo dâk tay bôk năp nkual Tây Nguyên. Năm 2023, rnoh rnăk ach o ta n’gor Dak Nông hŭch 2,8%, tâm nê, n’hŭch ach o  đah rnăk rnoi mpôl đê̆ ta ntŭk lah 8,1%. Đah nău dơi geh dja, Dak Nông dâk tay bôk năp Tây Nguyên mpeh n’hŭch ach o rnôk n’gor dâk tâl 2 lah Dak Lak geh rnoh n’hŭch ach o lah 1,5%. Wa Hồ Sỹ Hải, Kruanh jrô kan ntop kơl lam rêh jêng kon nuĭh, Sở LĐ-TB-XH n’gor Dak Nông an gĭt, ntơm bah rnôk njêng n’gor (năm 2004) tât aƀaơ, n’gor way ntrŏng nău n’hŭch ach o lah nău dơn kan rgum tơm.

Ăp nău nsrôih n’hanh âk trong nkra bah n’gor hŏ nsĭt geh tay nău dơi di ma rhơn rnôk nchih rgum tâm 20 năm aơ, Dak Nông lah ngoăy tâm 10 n’gor geh rnoh n’hŭch ach o dŭt ngăch lam dak n’hanh dâk bôk năp nkual Tây Nguyên. Rnoh âk rnăk ach o bah n’gor hŏ hŭch ntơm bah 33,7% tâm kêng dŭt năm 2004 tât aƀaơ dơn hôm 5,2%. N’gor n’gluh tât năm 2024 hŭch 3% rnăk ach o nsum n’hanh nsrôih tât lĕ năm 2025 mô hôm geh rnoh rnăk ach o di rnoh mhe. Gay dơi tât ăp rnoh kan dja, ndrel đah nău dŏng ăp trong kơl bah Ngih dak, Dak  Nông dôl rgum tĭng ƀư âk trong nkra ngăn ngăn n’hanh geh nău tam.