Xã Nhân Cơ (nkuăl Dak Rlâp) tă lah du xă ach o, ƀư lŏ mir lĕ rgâl jêng ntrôl dăng n’hanh ntoh lư an nău hun hao uĕh bah n’gor Dak Nông. Nhân Cơ aƀaơ geh công nghiệp, tăch rgâl, rhŏ nău hun hao bôk năp bah Dak Nông kơt Tây Nguyên. Nklang xă, ăp ntŭk tăch ndơ uĕh têh tâm nkrĭp, du đêt ngân hàng sĭt tât xă pơk mpông. Ăp nău ƀư tăch rgâl, rhŏ kan geh n’gŭr răm. Nău rgâl aơ ntơm bah rlău 10 năm bah năp rnôk Ngih dak mbơh ƀư nău nchrăp joi bô xít, ndơ̆ an dŏng Ngih măy Alumin ta aơ lĕ ƀư ntrŭt an wăng sa, rêh jêng lĕ xă Nhân Cơ n’hanh ăp nkual kiău ma hun hao. Nô Điểu Phương, nuĭh Bunong, ƀon Bu Dấp, xă Nhân Cơ an gĭt, bah rnôk lăp ƀư phung pah kan ngih măy Alumin Nhân Cơ, nău rêh bah rnăk wâl nô lĕ rgâl lĕ rngôch. Đah rĭng geh prăk rlău 10 rkeh/khay, ur sai nô lĕ ƀư du mlâm jay têh uĕh, ăp kon dơi nti nsơm tât lôch tât dŭt:

Bah năp đaơ rnôk ngih măy mô hŏ ndâk njêng, nuĭh ƀon lan tâm ƀon dŭt âk lah ƀư mir. Jêh nĕ rnôk geh ngih măy ndâk njêng, gâp lap dơi săch dŏng lăp kan, aƀaơ geh prăk nkôp đah bah năp lĕ đăp mpăn lơn.

N’gor Dak Nông geh rnoh bô xít geh nklăp 70% lam dak n’hanh dơi uănh lah ntu quặng bô xít têh ngăn Đông Nam Á. Đah nău geh têh, Dak Nông mĭn rgum hun hao công nghiệp khlay lah công nghiệp Alumin-nhôm gay nta an hun hao wăng sa-rêh jêng. Ăp năm, nău kan công nghiệp ê nkra bô xít, nkret njêng Alumin dôl rgop an tơm prăk n’gor nklăp 400 rkeh prăk, geh nklăp 40% rnoh khlay nkra njêng công nghiệp n’hanh rlău 12% dĭng lĕ sŏk an tơm prăk bah n’gor. N’gor Dak Nông dôl rƀŏng tât jêng ntŭk công nghiệp bô xít-nhôm n’hanh bah kơi nhôm bah ngih dak. Bah nĕ, nău kan công nghiệp aơ mbra n’gâng tơm an jêng wăng sa ta ntŭk. Wa Nguyễn Bá Út, Giám đốc N’gâng kan Công thương n’gor Dak Nông an gĭt:

Nău kan công nghiệp bô-xít nkret njêng alumin, luyện nhôm tâm rgŏ năp n’gor Dak Nông mbra geh âk. Tĭng nuih n’hâm aƀaơ dăp rgum khoáng sản ngih dak, dăp rgum bô xít lĕ dơi uănh an. Bôl n’gor Dak Nông hôm e du đêt wăk kol yưn mpŏng đah nău nsrôih, bah lĕ trong chính trị, ndrel đah nău dôh rklaih bah ăp n’gâng kan nău kan, n’hanh nău uănh mĭn bah ăp nuĭh ntuh kơl têh, tập đoàn têh lăp ta aơ ri tâm năm tât nău aơ mbra dŭt hun hao.

Ndrel đah công nghiệp, ăp ntil lŏ mir, tăch rgâl, nău rhŏ, pâl nđaih lĕ dơi n’gor Dak Nông uănh khlay hun hao n’hanh lĕ n’gluh ăp nău geh uĕh. 20 năm bah năp, ngăch hao jêng wăng sa (GRDP) n’gor Dak Nông mât đăp mpăn n’hanh nâp nâl. Dăp rgum jâng wăng sa nar lơ pơk hvi, ndơ̆ Dak Nông rklaih luh nău n’gor ach o, mbrơi hun hao. Dĭng lĕ khlay ndơ ta ntŭk tât dŭt năm 2023 geh 45.000 rmen prăk, âk rlău 24 tơ̆ nkôp đah năm 2004. Gay rgŏ jă ăp tơm prăk an hun hao, n’gor Dak Nông lĕ nsrôih rgâl hành chính, rgâl ntŭk ntô ntuh kơl, tăch rgâl. Bah kơi năm mât gưl đêt tâm bảng dăp hạng PCI lam dak, n’gor Dak Nông lĕ geh hao hạng uĕh, hao ta 38/63 lam dak (năm 2022). Nău rgâl nĕ lĕ ntrŭt dŭt n’hâm hun hao doanh nghiệp n’hanh dơi rnglăy wăch rgum ntuh kơl an n’gor. Aƀaơ, Dak Nông geh rlău 3.700 doanh nghiệp đah dĭng lĕ prăk dăn ƀư rlău 35.000 rmen prăk nkôp đah 93 doanh nghiệp năm 2004. Wa Hồ Văn Mười, Kruanh UBND n’gor Dak Nông nkoch, gay rlet rlău nău tă ngoăy tâm âk n’gor ach o ngăn lam dak, ntoh ntơm bah dâng, N’gor ủy, HĐND n’hanh UBND n’gor lĕ an ăp nghị quyết, ăp bôk nău kan ƀư ngăn đah trong rƀŏng trung ương, tâm di đah nău ngăn ta ntŭk. Nkre, rgum ntĭm rđău, ƀĭt joet, tâm rgop na nê̆, ndơ̆ nghị quyết bah Đảng lăp tâm nău rêh. Dak Nông lĕ mât uĕh n’hâm soan an nău kan hun hao:

Ăp gưl ủy, n’gâng kan ƀon lan n’gor Dak Nông mât uĕh nău way ơm tâm rnglăp, nuih n’hâm rlet jêr jŏt, rgâl mĭn ƀư mhe, janh mĭn, janh ƀư, janh trok dơn yor nău geh nsum, ngăn lah nuĭh djôt bôk gưl ủy, n’gâng kan ƀon lan ăp gưl. N’hanh mpôl hên uănh khlay rdâk hao nău mĭn, nău ŭch hao, mât uĕh soan dăng tâm rnglăp bah cán bộ, đảng viên n’hanh nuĭh ƀon lan ăp rnoi nuĭh. Gay ndơ̆ Dak Nông rgâl hao tĭng jâng wăng sa nâp nâl, jêng n’gor dăng, ƀon lan ndrŏng, bri dak neh ntu uĕh, nău rêh kon nuĭh tâm rnglăp.

Bah kơi 20 năm ndâk njêng, n’gor Dak Nông lĕ geh âk njoat hun hao têh. Âk nău dơi geh, nău dăng dôl dơi n’gor ƀư, mât uĕh geh săk rnglăy an hun hao wăng sa, rêh jêng. Nău rƀŏng n’gor dăng, ƀon lan ndrŏng, bri dak neh ntu uĕh, nău rêh jêng tâm rnglăp đah Dak Nông mbra mô hôm ngai.