Wa Trần Đình Hiệp, Giám đốc N’gâng kan Tài nguyên n’hanh Môi trường n’gor Dak Nông an gĭt, nu nău pĭch rlâm kơh dak me Krông Nô lĕ geh âk năm aơ, ngăn lah rnôk jêh ăp nău nchrăp ƀư thủy điện Buôn Tua Srah n’hanh thủy điện Chư Pông Krông. Wa Hiệp mĭn lah đŏng nu nău pĭch rlâm kơh dak me Krông Nô geh nkô̆ nău yor ƀư sŏk choih bah ăp doanh nghiệp yor lĕ 2 n’gor Dak Lak n’hanh Dak Nông pă an. Dak me Krông Nô nar lơ pĭch rlâm n’hanh lơ hvi. Tĭng wa Hiệp, yor mô gĭt năl nău kan na nê̆ bah ăp doanh nghiệp geh tât jêng nău rmal nău kan n’hanh nău trok an nuĭh ƀon lan dôl mâp âk jêr jŏt:

“Yor nkô̆ nău tă bah sŏk choih n’hanh thủy điện yor nê thủy điện-nuĭh tơm ntuh kơl lah Buôn Tua Srah mô tâm ban ŭch rnoh trok neh ma đă n’gor an nking n’gang gay an ăp ntŭk kan sŏk choih geh tât 2 ding ndrel tâm rgop trok an ƀon lan. Aƀaơ jêr lah nău pĭch rlâm neh kơt nĕ yơn uănh lah rnoh khuch, ndâk âk gưl rhiăng bah nuĭh tơm ntuh kơl dŭt jêr jŏt, thủy điện ndâk âk gưl rhiăng, sŏk choih ndâk âk gưl rhiăng ri mô hŏ dơi uănh lah”.

Tĭng wa Trần Văn Khánh, Giám đốc Công tỷ thủy điện Buôn Kuốp, nu nău pĭch rlâm kơh dak me krông Nô lĕ dơi năl yor âk nkô̆ nău kơt neh ntu, rgâl trôk nar, sŏk choih n’hanh dŏng thủy điện. Tâm nĕ, nkô̆ nău dŏng thủy điện geh nău kan bah công ty thủy điện Buôn Kuốp. Yơn lah, bah năm 2018 tât aƀaơ, ngăch pĭch rlâm kơh dak me Krông Nô dŭt ngăch n’hanh geh khuch dŭt têh bah nău sŏk choih. Mpeh công ty thủy điện nchrăp trok khuch khat an nuĭh ƀon lan, yơn đah nău đă n’gâng kan ƀon lan an uănh lah, tâm pă kloh nău kan bah lĕ rngôch ăp doanh nghiệp geh tât.

Tĭng wa Khánh đŏng, ta du đêt gưl pĭch rlâm, Công ty thủy điện Buôn Kuốp dơn nău kan trok. Bah năp đaơ, ăp rnoh neh nkra njêng bah nuĭh ƀon lan pĭch rlâm, n’gâng kan ƀon lan uănh an trong mkra, công ty geh nkô̆ nău pháp lý gay an prăk trok. Yơn âk năm dăch aơ, n’gâng kan ƀon lan đă công ty an tâm ton êng đah nuĭh ƀon lan tâm nău trok:

“Aƀaơ mhe ntoh nău, trong ƀư tâm ban bah năp ri n’gâng kan ƀon lan an lah, yor ăp nău ntrŭnh pháp lý, n’gâng kan ƀon lan mô uănh trong trok tay ma đă công ty thủy Buôn Kuốp hăn tâm ton đah nuĭh ƀon lan mpeh prăk trok, ntop kơl rnoh neh geh pĭch rlâm. Trong trok, ntop kơl an dơi ngih pah kan mât uănh ngih dak uănh an ri công ty mhe dơi luh prăk. Sam ƀŭt njuăl hôm rƀŭn djăt rƀŭn yơn mô dơi dôh rklaih”.

Wa Trần Đăng Ánh, Groi kruanh UBND nkuăl Krông Nô, n’gor Dak Nông an gĭt, nău trok khuch khat pĭch rlâm neh mir ta dak me Krông Nô năm bah năp yor 2 nuĭh lah công ty sŏk choih n’hanh công ty thủy điện ƀư. Ăp gưl pĭch rlâm mpeh tâm ntŭk sŏk choih dơi an ri ăp công ty choih tâm ton êng trok an nuĭh ƀon lan. Du đêt gưl pĭch rlâm mpeh tâm nău pă an ăp doanh nghiệp sŏk choih ri mpeh công ty thủy điện Buôn Kuốp dơn trok.

Bah năp, UBND nkuăl uănh an trong trok rnoh neh pĭch rlâm. Yơn rnôk uănh mĭn tay Luật neh ntu 2013 ri mô ntrŭnh n’gâng kan nkuăl sŏk neh, trok ntop kơl an nău ƀư bah ngih măy thủy điện ƀư. Yor nê, nkuăl lĕ ndơ̆ trong tâm rgop, ntop kơl công ty thủy điện ƀư tŏng ăp trong trok kơt bah năp đaơ, knŭng êng ta n’gleh dŭt lah công ty uănh an trong trok. Bôl ndrĭ, mpeh Công thủy điện Buôn Kuốp mô hŏ ŭch, jêng tât wăk kol jŏ jong:

“Nkuăl lĕ pah kan đah Công ty Buôn Kuốp âk tơ̆. Nkuăl ntĭm rđău jrô kan Tài nguyên n’hanh môi trương uănh năl du trong geh nău mbơh uănh năl, njuă tât công ty. Công ty knŭng tĭng nău nĕ gay ký yơn công ty lŏ đă uănh an ri wăk kol ta ntŭk aơ. Aƀaơ dôh rklaih du gưl aơ dơm; Uănh an trong ƀư ta gưl nkuăl mô lah nuĭh tơm ntuh kơl-ntŭk kan ƀư tĭng trok. Mpŏng công ty Buôn Kuốp tâm rgop rjăp lơn, lơn lah dăn trong ƀư gưl bah lơ gay geh trong mkra”.

Mhe aơ, Kruanh UBND n’gor Dak Nông lĕ ntĭm rđău N’gâng kan Tài n’hanh Môi trương ƀư mpôl hăn uănh, tâm rgop đah n’gor Dak Lak năl na nê̆ nkô̆ nău pĭch rlâm kơh dak me Krông Nô n’hanh trok dơn ăp ding geh tât gay ơm ƀư trok neh an nuĭh ƀon lan. Nkre, ăp ngih pah kan geh tât bah n’gor an ƀư tĭng rjăp nău ntrŭnh ta Nghị định 23 bah Chính phủ ntrŭnh mpeh mât uănh choih, pĭch rlâm kơh dak me n’hanh mât njrăng kơh dak, ndrâm dak