Djôt tâm ty nau tă geh xét nghiệm mham, điện tim, siêu âm jêh nar khám n’hâm soan yor rmôt ăp nai dak si Ngih dak si Nội tiết Trung ương ƀư tâm nkuăl 4 Hải quân, yuh Phạm Thị Thoa, ur cán bộ dôl kan tâm nkuăl 4 saơ đăp mpăn ngăn. Bah rnôk aơ, rnơm geh nau khám săch bah rmôt nai dak si Trung ương tâm rgop ma nai dak si tahen bah Đội săm 486, nkuăl 4 Hải quân ma yuh saơ păng geh môr tul kno, jêh rnôk rek, săm, n’hâm soan yuh mbơm oi. Yuh Thoa nkoch:

            ‘Kơt nau vay ri hăn khám ngai ngăn, rnôk aơ ăp nai dak si ngai tât ta aơ gay ma khám ân ri knŭng roh du ôi dơm, nau vay ri hăn roh du pơh mơ. Nau kan bah ăp nai dak si hăn ta aơ ri ueh ngăn, kơl an âk ngăn ân nŭih ƀon lan Khánh Hoà ta aơ”.

            Tâm ăp nar khám n’hâm soan, Trung tá Nguyễn Hữu Nhất, Kruanh rmôt tahen Sư đoàn 377, Quân chủng phòng không không quân kŏ ndrel ma tahen nơm hăn tât ơm ngăn ta Đội săm mrô 486:

            “Bah năp ma hăn khám săch ta aơ, rmôt kan hŏ geh sŏk mham xét nghiệm lor, ăp rnoh mrô xét nghiệm âk ngăn ăp đồng chí geh mô ueh tâm trong proch mpeh sĭk hao, ngi. Bah nau khám đah aơ ri ăp nai dak si ueh ngăn, mbơh kloh, cán bộ tâm rmôt kan ri đăp mpăn tâm nau pah kan, nau kan jru bah nơm”.

            Hŏ âk năm ma aơ, ăp năm ri rđau kan Ngih dak si Nội tiết Trung ương kŏ ndrel ma rmôt nai dak si blau ngăn bah ăp khoa bah Ngih dak si tât khám, săm ân ăp cán bộ, tahen tâm Ntŭk tahen Cam Ranh ndrel ƀon lan tâm Phường Cam Nghĩa ndrel nkuăl Cam Lâm, n’gor Khánh Hoà. Ngăn lah, tâm năm 2020, ngih dak si săm ji hŏ kơl ndâk du jrâu khám Đa khoa, Ngih dak si Lữ đoàn 101, nkuăl 4 Hải quân tâm xã Cam Thành Bắc, nkuăl Cam Lâm. Tât rnôk aơ, jrâu khám bah Ngih dak si Lữ đoàn 101 jêng ntŭk rnơm bah cán bộ ndrel ƀon lan tâm nkuăl rnôk geh ji kuet. Wa Cao Quốc Khánh, nŭih ƀon lan xã Cam Bình, Nkuăl ƀon têh Cam Ranh, ndơn:

            ‘Nai dak si ta aơ kŏ gơih ngăn kan, mât chăm ân nŭih ji, ntĭm, ăp jrâu bĭch, ăp nau ntĭm ueh ngăn, ăp khay gâp kŏ hăn veh huyết áp. Rnôk Lữ đoàn 101 geh ngih dak si ri aơ lah ntŭk bôk năp gâp hăn khám lah geh nau mô ueh n’hâm soan. Hăn ta aơ ri đăp mpăn ngăn”.

            Ntơm bah nau kan bôk năp hôm mô tŏng ăp, đah rnoh nŭih ji ăp năm nklăp 300 nŭih, jêh rnôk geh kơl an mpeh nau kan, ndơ dŏng tă bah Ngih dak si Nội tiết Trung ương, ăp năm, ngih dak si Lữ đoàn 101 hŏ khám, săm ân 18 rbăn nŭih ji. Êp nê, ăp ngih dak si Trung ương hŏ đă đă âk nai dak si gay ma kơl an, jao nau kan, kơl n’hao nau blau ân ăp nai dak si, đah nuih n’hâm kan ndrel tâm kơl ma ăp tahen Hải quân Việt Nam dôl gŭ kan tâm ăp nkuăl gôl dak ngai ngĭn bah neh dak geh mât chăm ueh lơn mpeh dak si, bah nê, tâm rgop nsum tay mpeh nau tâm rnglăp đah tahen ndrel ƀon lan Việt Nam./.