Tâm bah ri aơ nơh ndrel đah nău tâm tom ndeh khĭt rmanh jru geh ta n'gor Quảng Nam ƀư 10 nuĭh khĭt, ri ta n'gor Kon Tum geh 2 tơ̆ rlơt ndeh rdeng ndơ lơh 3 nuĭh khĭt ta ntŭk n'hanh 4 nuĭh geh rmanh đŏng. Bah năp geh ma nău hao âk rlơt tâm tom ndeh khĭt rmanh jru hô, mpôl kan dơi kan hŏ ntĭm nti n'hanh nkah njrăng lor đah ăp nuĭh ƀĭt ndeh hăn rlău n'gor dja.  

Geh âk nău tâm ban tâm bar rơh rlơt ndeh măng nar 12 n'hanh măng 14/2 mhe aơ ta trong Hồ Chí Minh, gâl hăn rlău nkuâl Đăk Glei n'hanh quốc lộ 40B, gâl hăn rlău nkuâl Đăk Tô, n'gor Kon Tum, nê lah: Lĕ bar tơ̆ rlơt ndeh rdeng ndơ jêng geh tât 3 nuĭh khĭt, 4 nuĭh rmanh; lĕ bar hê nuĭh ƀĭt ndeh lah nuĭh tât bah n'gor êng da dê, du hê gŭ ta n'gor Thanh Hoá n'hanh du hê gŭ ta n'gor Long An. Ndrel đah nău tă bah mô way bên trong, tĭng Thượng tá Nguyễn Xuân Hướng, Groi kruanh Jrô kan Cảnh sát giao thông, Công an n'gor Kon Tum, nuĭh geh âk năm tĭng groi nđôi, nkra ăp rơh tâm tom ndeh jru hô ta n'gor Kon Tum ri nău tih ŭanh lhơ lah nkô̆ tơm ƀư jêng tât ăp rơh tâm tom ndeh:

"Mpôl hên saơ lah lơn âk nău tih tă bah nuĭh ƀĭt ndeh uănh lhơ jêng tât rlơt tâm tom. Bôk năp lah nchuăt rtil ngăch. Tâl bar lah đôl đal. Geh ăp gâl trong rnôk ma nuĭh ƀĭt ndeh tâm groi bah kơi du gâl trong jong ri geh du đêt nuĭh ƀĭt ndeh lah mô dơi ŭch tĭng groi bah kơi, đôl đal mô hăn tĭng mbor trong tor ma đal rhot ri mâp ndal gâl trong kue, ăp gâl trong hăn rlơ̆ tay ri geh ăp ndeh hăn rlơ̆ tâm tom".

Tĭng Thượng tá Nguyễn Xuân Hướng ta ăp trong quốc lộ hăn rlău n'gor Kon Tum geh ăp gâl trong sop nkue nkuăch klach rvê an ăp nuĭh ƀĭt ndeh ân dŭt njrăng uănh, nê lah: đèo Lò Xo, ta trong Hồ Chí Minh; đèo Văng Rơi, ta trong quốc lộ 40B; đèo Măng Đen, đèo Vi ô lắc ta trong quốc lộ 24; đèo Ngọc Vin ta trong quốc lộ 14C… Thượng tá Nguyễn Xuân Hướng an gĭt, ta năp geh ma nău hao âk ăp rơh rlơt tâm tom ndeh jru hô ta ăp njăr trong hăn rlău n'gor tâm ăp nar mhe aơ, mpôl cảnh sát giao thông hŏ n'hao dăng pah kan ntĭm nti n'hanh nkah njrăng lor an ăp nuĭh ƀĭt ndeh:

"Ăp nuĭh ƀĭt ndeh rdeng ndơ, ndeh rdeng năch lơn lah ăp nuĭh ƀĭt ndeh rdeng ndơ têh jâk lor rnôk njŭr sop nkue ân rlu rlău, uănh năl tay siăk ndeh, ndơ ƀĭt ndeh, an nđik jâng ndeh. Rnôk njŭr sop ân njrăng ŭanh khlay tât ăp păng pla nchih, nkah njrăng mpeh hăn trong. Nuĭh ƀĭt ndeh ân plơ̆ tay mbrô jê̆ gay bah ir mpet jâk tât jot siăk jêng ŭnh sa siăk, mô kăp siăk ri dŭt klach rvê ngăn".

Wa Khuất Việt Hùng, Groi kruanh way mât uănh mpeh Ủy ban đăp mpăn hăn ntung trong gưl neh dak an gĭt, ta n'gor Kon Tum lah êng n'hanh nkual Tây Nguyên lah nsum nô nău tih quy định pháp luật mpeh đăp mpăn hăn ntung trong, kơt ndeh rdeng lăn lhăt bêng ir, nuĭh ncho ndeh honda mô ndô môk bảo hiểm, hŏ ngêt ndrănh bia nha hôm ƀĭt ndeh hăn trong ...hôm geh âk đŏng. Ta ăp njăr trong hăn tâm nkual hôm way rŭ hôch geh ma nău rlơt tâm tom ndeh khĭt rmanh jru hô đŏng. Yor kơt nê̆ Ủy ban đăp mpăn hăn ntung trong gưl neh dak n'hanh n'gâng kan ta ntŭk, n'gâng kan dơi  kan ăp n'gor ân ntrôl dăng pah kan nkoch trêng gay nuĭh ƀon lan gĭt êng n'hanh nău way bah nuĭh hăn trong:

"Nău he ƀư nkoch trêng ăp nău  mbơh gĭt lor mpeh đăp mpăn hăn ntung trong, kơt: hŏ lăn ngêt ndrănh bia mô ƀĭt ndeh, mô rdeng lhăt bêng ir, mô nchuăt nkêng nkăng, nchuăt rtil or ngăch, ndô môk bảo hiểm di rnoh nâp uĕh rnôk ncho ndeh honda. Ăp nău mbơh gĭt lor dŭt dơh nkah. Ma nău kan nkoch trêng ri ăp băl druh ndăm rchong, âk mpưm nuĭh ƀon lan rƀah gĭt ăp nău way an pháp luật, rƀah gĭt dơi ăp nău mbơh gĭt lor mpeh đăp mpăn hăn ntung trong. Bah nê mbrơi mbrơi kơl an nuĭh ƀon lan n'hao nău gĭt êng mpeh pháp luật mpeh đăp mpăn hăn ntung trong n'hanh kơl an nô nău đăp mpăn hăn ntung trong ta nkual nar lơn ma dơi rgâl uĕh"./.