Ta Gia Lai, tâm bah ri aơ, geh mbro ăp nău kan văn hóa – pâl nđaih têh. Bah nê mpơl dơi săk tơm văn hóa âk mpưm, săk ntơr bah ƀon lan ăp rnoi mpôl đê̆... nkre nkoch n’hơ săk geh pâl nđaih dŭt n’hâm uĕh bah n’gor Gia Lai.

Pơh Văn hóa-pâl nđaih Gia Lai năm 2023 ƀư ntơm bah nar 11 tât 18/11 đah nău tât râng bah nklăp 1.000 nuĭh gĭt blău njroh mprơ tâm n’hanh bah dih n’gor. Tâm nê, ntŭk rgum tơm lah Festival ntŭk tŭr chĭng gong Gia Lai 2023 rgum mpôl gĭt blău chĭng gong bah 17 nkuâl, thị xã, nkual ƀon têh lam n’gor n’hanh ăp n’gor Tây Nguyên. Lôch nê lah ăp lễ hội săk ntơr kơt lễ hội kao tăng – yôk ŭnh Chư Đang Ya (nkuâl Chư Păh); rơh tâm rlong duk si lôk dak me Pô Cô (nkuâl Ia Grai). Nkhêp geh rnôk dja, ta nkual ƀon têh ƀư ăp lễ hội trong nkual ƀon têh; rdâk tay nău kan văn hóa nsum mpôl, nău way ơm ƀon lan; pla n’hơ, mbơh nkơnh ndơ uh goh Tây Nguyên.

Nthoi tay Pơh Văn hóa-pâl nđaih Gia Lai, ta nkual ƀon têh Pleiku ƀư Nar rgum pâl nđaih 2023 n’hanh tâm rlong nchuăt Gia Lai City Trail- wơl geh bri neh têh hvi. Năch pâl nđaih n’hanh nuĭh ƀon lan dơi djăt uănh ăp măng nchreng chĭng gong khuh n’gôr bah năp mpông mpêr bri dak uĕh măt uănh Biển Hồ. Ta nâm n’hâm tơm n’ho nđik uĕh, lah pla n’hơ Pleiku kăl e n’hanh aƀaơ, đah 100 păng rup mpeh ăp nkô̆ kon nuĭh, bri dak uĕh măt uănh, nkual ƀon têh, văn hoá, lễ hội ta Pleiku ntơm bah năm 1975 tât aƀaơ. Wa Ngô Văn Hoà- Chủ nhiệm Câu lạc bộ nai ntĭm n’hanh kon se nti, nuĭh tơm ƀư bah păng rup an gĭt:

“Rup ơm gâp geh ntŭk rgum prăp ơm bah 2008 tât aƀaơ. Rup dja mô geh bản quyền, ăp trang mạng n’glăp da dê. Gâp ƀư tâm ndôn, njônh bah rup mhe tâm  ban kơt njônh bah rup ơm, gay bu tâm rđĭl. Du đêt nuĭh lah rup kăl e uĕh, geh nuĭh lah Pleiku aƀaơ têh uĕh mhe. Gâp ŭch nuĭh ƀon lan Pleiku uănh tay rup kăl e; mpôl kon se saơ dơi nkual ƀon têh Pleiku hun hao kơt aƀaơ lah nơm geh suan rgop bah âk rơh kơn u che n’hanh ƀon lan ăp rnoi nuĭh tâm n’gor”.

Du ntŭk rgum tơm bah Nar rgum pâl nđaih 2023 rơh dja lah tâm rlong nchuăt “Gia Lai City Trail – Nău wơl geh bri neh têh hvi” đah nău tât râng bah 4000 nuĭh tâm rlong. Njăr trong jong 5km, 10km, n’gul marathon (21km) n’hanh full marathon (42km) dơi ntơm bah ntŭk bri dak uĕh măt uănh Biển Hồ da dê, nchuăt rlău ăp mir chè n’hanh mbor tơm n’ho rhiăng năm, rhot mpông Chùa yău Bửu Minh, tât yôk ŭnh Chư Đăng Ya mprang êr kao tăng bah nkuâl Chư Păh. Njăr trong rlŭ rlĕ bah trong nkual ƀon têh, trong glăt, yôk sop,  di tâm rnôk khay dŭt uĕh bah dor yôk Gia Lai. Wa Nguyễn Thị Hậu Hiền, hŏ bơi 70 năm deh, ndrel rnăk bah Hà Nội lăp nkual ƀon têh Pleiku pâl nđiah n’hanh râng tâm rlong nchuăt, rhơn nđơr lah:

“Yôk ŭnh n’hanh kao tăng, rup dŭt uĕh hôm; geh tơm n’ho kơt aơ ri n’hâm sial dŭt kloh uĕh. Kon nuĭh Pleiku ri dŭt dêh bên. Ntơ rơh tâm rlong nchuăt lah wơl geh bri neh têh hvi, aơ lah nău wơl geh bah gâp ntơm bah âk năm  aơ hôm. aƀaơ hôm dơi râng nchuăt ta aơ đah bri dak rup uĕh ndrel đah rnăk wâl, gâp dŭt rhơn mƀak”.

Tĭng mpôl tơm leo ƀư, lah tâm rlong nchuăt trail- nchuăt nkre đah hao yôk ta âk gung trong êng êng lor bôk năp dơi ƀư ta Gia Lai, tâm rlong năm aơ hŏ njêng luh du suan wăch rgum têh đah mpôl nchuăt lam dak. Tâm rnoh ăp nuĭh tâm rlong nchuăt ta rơh dja geh âk  nuĭh hŏ tă geh nău dơi nkhôm rnê têh ta rơh tâm rlong nchuăt lam dak tâm ban kơt ta ntŭk tâm rlong dak bah dih đŏng. Tâm rlong nchuăt hŏ dơn geh nău ŭanh khlay, nău ŭch kơl bah 35 đơn vị, doanh nghiệp đah rlău 1 rmen prăk măt n’hanh âk ndơ êng ƀa ƀă. Rlău ma dŏng an pah kan leo ƀư, du gâl prăk dŏng mbra an pah kan đăp mpăn lam rêh jêng kon nuĭh ta nkual ƀon têh Pleiku n’hanh rgop an prăk nkrem “Ao răm an oh”.

Wa Nguyễn Xuân Hà- Kruanh jrô kan Văn hoá Thông tin Nkual ƀon têh Pleiku, n’gor Gia Lai an gĭt: đah âk nău kan văn hoá, thể thao, njroh mprơ săk ntơr, Nar rgum pâl nđiah 2023 bah Nkual ƀon têh Pleiku hŏ nsĭt tay ăp trong hăn saơ uĕh đah nuĭh ƀon lan n’hanh năch pâl nđiah. Aơ lah rnôk gay n’gor nkoch n’hơ rup gui kon nuĭh dêh bên, bri dak n’hanh văn hoá bah Pleiku.

“Ăp nar rlău aơ, ăp nhih pah kan đơn vị, ăp xã phường, ăp nuĭh blău chĭng gong tiăr nti, ŭch rŏng mpơl an năch n’hanh ăp nuĭh tât râng tâm rlong ta ăp nkual saơ rup uĕh văn hóa n’hanh nău rŏng năch bah nuĭh ƀon lan Pleiku. Bah aơ, Nkual ƀon têh ŭch rŏng mpơl gĭt lor nkual ƀon têh Pleiku dêh bên rŏng năch  n’hanh lah dor yôk nđĭr uĕh n’hanh ngăch dăng an n’hâm suan”.

Nar rgum pâl nđiah nkual ƀon têh Pleiku 2023 ƀư ntơm bah nar 17-19/11 ta nkual pâl nđaih bri dak uĕh măt uănh Biển Hồ, xã Biển Hồ (nkual ƀon têh Pleiku). Tât đah nar rgum, năch lam ăp ntŭk dơi n’glăp săk he tâm mông nar văn hóa ntĭt êng bah rnoi nuĭh ƀon tơm ta ntŭk ma  ăp nău njroh mprơ  chĭng gong, rdâk tay du đêt nău way ơm văn hóa bah ƀon lan ăp rnoi mpôl đê̆, pla n’hơ rup Pleiku kăl e n’hanh aƀaơ, rup pâl nđaih Pleiku… Rlău ma nê, râng Nar rgum, năch hôm dơi rlong n’hŭm ƀô ndơ sa ntĭt êng bah Gia Lai, ăp ndơ geh ƀư OCOP. Đah ăp nar kan văn hóa – pâl nđaih geh ƀư mbro tâm ăp khay 11/2023, hŏ mpơl dơi săk tơm văn hóa âk mpưm, săk tơm bah ƀon lan ăp rnoi nuĭh. Nkre nkoch n’hơ săk geh pâl nđaih dŭt n’hâm uĕh bah Gia Lai.