VOV4.M’nông- Kêng măng nar 12/8, nar lĕ ƀon lan mât đăp mpăn rnă njrăng ngih dak năm 2022 geh n’gor Gia Lai ƀư ta 2 nkuăl Chư Păh n’hanh Phú Thiện. Bâh bôk năm tât aƀaơ, ta n’gor Gia Lai, nău nuĭh tih mpeh hình sự lĕ hŭch âk mpeh rnoh, rnoh nuĭh khĭt n’hanh rnoh nuĭh rmanh. Tâm nĕ, rnoh nhup ban nău tih jru, dŭt jru geh tât 93,5%. Nău kan rdâk njêng nău pah kan lĕ ƀon lan mât rnă njrăng ngih dak mô rlu geh rgâl mhe lĕ nkô̆ nău n’hanh trong leo kan, geh âk nuĭh tât râng.

Tât tay, lam n’gor geh 550 ntŭk tổ dân phố, thôn, ƀon, ngih nti, ntŭk kan, doanh nghiệp đah rlău 50.450 nuĭh tât râng nău kan, ntop dŭt khlăy ndrel đah ăp mpôl kan tâm rdâng, njrăng nuĭh tih, mât đăp mpăn rnă njrăng. Tâm let năp tay, rnâng kan ntĭm leo njrăng nuĭh tih n’hanh rdâk njêng nău kan lĕ ƀon lan mât đăp mpăn rnă njrăng ngih dak n’gor Gia Lai ŭch ăp ntŭk kan, n’gâng kan geh rdâk njêng ueh nău kan ta ntŭk, mbơh tơih rgŏ jă nuĭh ƀon lan nsrôih tât râng nău kan njrăng rdâng ƀư rai ăp nău mplư rlăm bâh mpôl rlăng, njrăng nuĭh tih, n’hao tâm rnglăp lĕ ƀon lan.

Nuĭh rblang: Thị Đoắt