VOV4.M’nông:   B’gor geh âk ƀon lan rnoi mpôl đêt, wăng sa jêr jŏt, tâm âk năm, nuĭh ƀon lan geh âk ntŭk tâm n’gor Gia Lai geh bảo hiểm y tế an dơm. Yor nău hun hao wăng sa rêh jêng ƀon lan, âk thôn ƀon lĕ bah jêr jŏt, mô hôm dơi ntop kơl bảo hiểm y tế lĕ rngôch, jêng rnoh nuĭh râng bảo hiểm y tế hŭch âk, kônh wa mâp jêr jŏt rnôk trok prăk but uănh săm ji. Ta năp nău ngăn aơ, nău kan dơi kan n’gor Gia Lai lĕ ƀư tĭng âk trong mkra n’hanh lĕ ntơm hao âk nuĭh rnoi mpôl đêt râng bảo hiểm y tế.

Rnăk yuh Kpă Bli ta thôn Plei Tel B (xă Ia Sol, nkuăl Phú Thiện, n’gor Gia Lai), lĕ ntrŭnh râng tay bảo hiểm y tế gay mât uănh săk soan an nơm n’hanh lĕ rnăk. Tĭng yuh Kpă Bli, bah năp đaơ, rnăk yuh tâm rnăk dơi ntop kơl 100% bảo hiểm y tế, yơn lah rlău 1 năm aơ lĕ mô hôm geh ntop kơl. Tâm năm nĕ, du gâl yor wăng sa jêr jŏt yor Covid-19, nău êng yor thơ tha jêng yuh Bli mô rwăt bảo hiểm. Ndrĭ mhe aơ, jêh rnôk lăp ngih dak si săm kop siêu vi n’hanh an trok prăk mô đêt, yuh saơ nău khlay bah bảo hiểm y tế:

        “Bah năp đaơ dơi ngih dak ntop kơl an bảo hiểm y tế, yơn aƀaơ Ngih dak mô ntop kơl bảo hiểm y tế tay. Mhe aơ gâp hăn êng ngih dak si ri trok lĕ rngôch prăk, rơh hăn hăn ngih dak si lĕ 1,2 rkeh prăk. Lah geh bảo hiểm y tế ri gâp mô roh prăk kơt nĕ. Tă aơ, gâp dơi gĭt gâp mbra rwăt bảo hiểm y tế”.

Tâm ban ma nĕ, yuh Rmah H’Brang ta thôn H’Li 2 (xă Ia Mrơn, nkuăl Ia Pa, n’gor Gia Lai) mhe rwăt bảo hiểm y tế. Yuh Hlil an gĭt, bah năp đaơ rnăk wâl dơi ngih dak kơl lĕ rngôch bảo hiểm, jêng mô hŏ geh trong prăk ngih dak si. Aƀaơ hin, rnoh kơl hôm 40%, rnăk wâl an rwăt lĕ 7 nuĭh yor saơ nău geh bah bảo hiểm y tế:

“Yor lah ăp nuĭh tâm rnăk wâl way hăn kan jêng mô gĭt nău mâp tât đah rnăk wâl, yor rĭ gâp an njrăng săk n’hanh rnăk wâl gay đăp mpăn lơn rnôk he hăn ƀư”.

Wa Nguyễn Hữu Hạ-Kruanh Bảo hiểm xã hội nkuăl Ia Pa an gĭt, bah rnôk ƀư kơt dŏng nău ntrŭnh 861/QĐ-TTg nar 4/6/2021 bah Thủ tướng Chính phủ uănh an nău kơl ăp xă nkual 3, nkual 2, nkual 1 tâm nkual rnoi mpôl đêt n’hanh nkual yôk lvang 2021-2025, lam nkuăl n’hŭch bơi 10 rbăn nuĭh râng bảo hiểm y tế, dŭt âk lah kônh wa rnoi mpôl đêt ta ăp xă nkual 2 n’hanh nkual 3 aƀaơ rgâl nkual 1. Gay mkra nău aơ, ntŭk kan nsrôih tâm rgop đah n’gâng kan ƀon lan ăp gưl n’hao nkoch trêng gay nuĭh ƀon lan wât lơn đah nău dơi n’hanh nău geh rnôk rwăt bảo hiểm y tế, n’hanh rwăt bảo hiểm y tế plơ̆ tay.

“Bah bôk năm 2022 dâl, Bảo hiểm xã hội nkuăl Ia Pa lĕ tâm rgop đah n’gâng kan ƀon lan ta ăp xă, ăp rmôt kan, nsum mpôl ta nkuăl ntrôl dăng trong kan nkoch trêng rgŏ jă nuĭh ƀon lan râng bảo hiểm y tế, lơn lah rgum tâm ăp nuĭh nuĭh mpôl đêt geh hŭch bảo hiểm y tế yor khuch bah nău kơl. Bah bôk năm tât aƀaơ, tă bah trong kan nkoch trêng, rgŏ jă ri lam nkuăl lĕ geh hao mpeh bảo hiểm y tế, kơp tât rnôk aƀaơ lam nkuăl lĕ geh nklăp 478.600 nuĭh râng bảo hiểm y tế, geh bơi 80% rnoh nuĭh râng bảo hiểm y tế”.

Lam n’gor Gia Lai aƀaơ geh bơi 1,27 rkeh nuĭh râng bảo hiểm y tế, geh rlău 82% rnoh nuĭh. N’gor nsrôih tât lĕ năm 2022 geh 90% rnoh nuĭh râng bảo hiểm y tế. Rlău ma trong kan nkoch trêng rgŏ jă tĭng trong “Tât gung, tĭng jay”, Bảo hiểm xã n’gor Gia Lai dôl tâm rgop đah ăp n’gâng kan, nău kan, nsum mpôl ƀư dŭt n’hâm âk trong mkra gay n’hao rnoh n uĭh râng. Ta năp măt, ntŭk kan mbra ƀư trong ntop kơl thẻ bảo hiểm y tế an nuĭh ƀon lan jêr jŏt, ƀon lan rnoi mpôl đêt. Ưa Lê Quốc Khánh-Groi kruanh bảo hiểm xã hội n’gor Gia Lai, an gĭt:

“Năm 2022 aơ, bảo hiểm xã hội Gia Lai lĕ ôp an HĐND n’gor an Nghị quyết 11 gay ntop kơl an du đêt rmôt nuĭh geh jêr jŏt. Dŭt n’hâm ƀư, n’hanh n’hao tay rnoh nuĭh râng uĕh lơn. Rlău ma nĕ, Bảo hiểm xã hội Gia Lai lĕ tâm rgop đah Đảng ủy Khối ăp Ngih pah kan, tâm ôp an Đảng ủy khối ăp ngih pah kan n’hanh Doanh nghiệp n’gor lĕ an trong nchrăp 48 rgŏ rgŏ jă ăp chi bộ, ăp ntŭk kan ntop kơl an nuĭh râng”.

                    Nuĭh rblang: Y Sưng Phê Ja