
Công an n’gor Gia Lai mhe ƀư nar luh hăn lơh mbram nuĭh tih, mât đăp mpăn rnă njrăng rƀŏng tât nkah ndray 80 năm Cách mạng Khay pham n’hanh Quốc khánh 2/9. Râng nar luh hăn kan geh kruanh Tỉnh ủy, UBND n’gor, ntơh măt du đêt cục nghiệp vụ Bộ Công an, ndrel rlău 1.500 cán bộ, tahen tât bah ăp đơn vị mpeh Công an n’gor Gia Lai.
Lah rđău đă ta rơh lễ, wa Phạm Anh Tuấn – Groi Bí thư Tỉnh ủy, Kruanh UBND n’gor Gia Lai rnê âk nău khlay kan bah mpôl Công an Gia Lai tâm trong mât nâp rnă njrăng chính trị, đăp mpăn lam rêh jêng kon nuĭh tâm bah ri aơ nơh, nkre đă lam mpôl kan ntik n’hao tay nău khlay kan n’gâng tơm, kan nsum lhăt đah ăp n’gâng kan, nsum mpôl, n’gâng kan ta ntŭk an ƀư 5 rmôt nău kan rgum tơm. Tâm nê lah rjăp nău ŭch geh rƀah gĭt nău lư bah tâm dâng, nkra ngăch geh ma nău ntoh nuĭh tih, rmal lhăt ăp ntil nău tih, mô an geh rgum jêng krit jêr; mô an geh ndrât ndal tâm ăp nău tât. Wa Phạm Anh Tuấn lah rjăp:
“Lam trong kan chính trị tâm n’gor ntik n’hao nuih n’hâm nchrăp lor, blău mhe, ƀư lĕ nuih n’hâm, ngăch ndal n’hanh dơn kan âk tâm nău kan mât đăp mpăn rnă njrăng, mât đăp mpăn ta ntŭk, njêng jâng nsing nâp gay rhŏ dŏng ƀon lan nar lơn ma uĕh. Rdâk njêng n’hanh n’hao nău dơi tam trong leo kan lam ƀon lan mât rnă njrăng neh dak, ntik n’hao suan dăng rgum bah lam trong kan chính trị tâm mât rnă njrăng, bah nê njêng trong leo ƀư tâm rlong khuh n’gôr, ngăn ngăn, geh nău tam an ăp rơh kơn ƀon lan.”

Lah ta rnôk dơn nău kan, Thiếu tướng Lê Quang Nhân, Giám đốc Công an n’gor Gia Lai an gĭt: rơh lơh mbram nuĭh tih rơh dja lah nău kan ngăn ngăn tĭng nău rđău đă bah Tỉnh ủy, UBND n’gor Gia Lai n’hanh Bộ Công an, mpơl nău nsrôih chính trị tâm mât njrăng nău rêh rngân uĕh bah ƀon lan, mât nâp rnă njrăng, rhŏ dŏng hun hao wăng sa rêh jêng kon nuĭh ta ntŭk.
Ntơm bah aơ tât n’gul khay 9, lam mpôl kan mbra rgum lơh mbram nuĭh tih klach rvê, nuĭh tih geh mpôl, an manh prăk deh kon âk, ma túy, ntŭng rmuănh, pit nchĭk ndơ, nuĭh tih pháp luật mpeh lơh djơh mpeh ntŭk gŭ rêh, lôk joi loih kông mô geh nău way dŏng công nghệ mhe gay ƀư nău tih.
Ngoăy tâm ăp ntŭk mhe lah nău Công an n’gor Gia Lai njêng n’hanh an mpôl hăn rsong uănh rgum nsum 151 – lah 2 rmôt gưl n’gor n’hanh 135 rmôt gưl xã, nkre đah rsong uănh nău way kan n’hanh ndơ rnă săk, leo ƀư mât kân lhăt jĭr ntŭk. Mpôl dja mbra rmal lhăt ăp nău tih ƀư rkhul wăk ntŭk âk nuĭh, rgum tâm rlong ndeh mô geh nău way, nuĭh tih trong nkual ƀon têh n’hanh ăp ntŭk duh ndal mpeh rnă njrăng. Thiếu tướng Lê Quang Nhân lah rjăp:
“Lĕ rngôch cán bộ tahen lam n’gâng kan n’hao tay nuih n’hâm rdôl lơh, tâm rnglăp, tâm ban ŭch, nsrôih rlău dơi ăp jêr jŏt ntul rlong ƀư wat jêh nău dơn kan dơi jao, way nchih nkah n’hanh treh têl jru tâm bôk rngok n’hanh tĭng ƀư ân dơi ma nău sŏng di yor neh dak chuêl săk, yor an ƀon lan rhŏ dŏng, nău lư săk lah nău huêng khlay dŭt têh. Lam mpôl công an n’gor mbra mô rlu nsrôih, ntik n’hao nău khlay kan n’hanh lah mpôl kan n’gâng tơm tâm pah kan mât đăp mpăn rnă njrăng, nsrôih ƀư wat jêh ăp ntil nău dơn kan”.

Lôch nar an ƀư luh hăn kan, âk cán bộ, tahen hŏ râng nchreng an uănh võ thuật du rơh n’hanh khí công tâm lơh, gâl nchreng an uănh mpơl dơi suan dăng, nuih n’hâm ntang loih n’hanh nău mĭn nchrăp rdâng lơh bah mpôl Công an ƀon lan. Ta rơh lễ luh hăn kan, Công an n’gor ƀư ntroh hăn ma bar pe jât bôk ndeh đặc chủng têh dăng mhe đŏng kơt ndeh chŏl ndrak, ndeh njêng n’gar nking barrie, ndeh bruh dak rdâng lơh rŭng răng, ndeh kơl nuĭh tât rmanh blău dŏng âk ntil ndơ, ndeh rđău đă njrăng n’gang puh n’hât ŭnh sa, ndeh hăn nkoch trêng nău lư, ndeh ntung gung hao puh n’hât ŭnh sa, ndeh rdeng so, seh rhŏ dŏng kan… jêng nuih n’hâm khuh n’gôr, nchrăp gŭ kâp njrăng, rdâng lơh n’hanh kơl ăp nău tât./.
Viết bình luận