Lơ 9/8, wa Võ Thị Ánh Xuân, uỷ viên Rnâng kan rđau kan Trung ương Đảng, Groi Kruanh dak hŏ hăn mêt uănh nau rklaih khuch bah mih dak lip ndrel rlun neh tâm n’gor Sơn La. Ntơm bôk khay 7 tât rnôk aơ, Sơn La mih dak lip ƀư 12 nŭih khĭt, rlau 2.600 ngih ƀon lan geh khuch, bơi tât 30 ngih săm ƀŭt geh khuch, ntrong hăn, trong điện...geh djơh hô. Nchrăp rnoh nau khuch rlau 500 rmen. Wa Võ Thị Ánh Xuân, Groi Kruanh dak hŏ njoăl nau pă nau rngot ngăn tât cán bộ, ƀon lan nkuăl dak lip Sơn La.

Groi Kruanh dak đă N’gâng kan tuch tăm ndrel Hun hao ƀon lan geh nau kan jŏ jong lơn, kơl an ăp nưal vay geh dak lip kơt Sơn La geh nau kan, ntrong kan, nau mbơh, ndơ dŏng gay ma huch ngăn nau khuch tât nau rêh ƀon lan, kơl ƀon lan đăp mpăn nau rêh. Di rnôk aơ, Groi Kruanh dak Võ Thị Ánh Xuân hŏ kơl an n’gor Sơn La 700 rkeh; kơl 2 nkuăl Mai Sơn ndrel Thuận Châu 200 rkeh prăk rlaih nau khuch bah mih dak lip./.