VOV4.M’nông –  Ôi 15/8, Groi thủ tướng Chính phủ Phạm Bình Minh râng nar rgum lam ƀon lan mât uănh rnă njrăng neh dak năm 2022 ta xă Việt Dân, nkual têh Đông Triều, n’gor Quảng Ninh. Ntoh ngơi ta nar rgum, Groi Thủ tướng kơp dơn n’hanh rnê ăp nău geh ntoh lư tâm ntrong leo Lam ƀon lan mât uănh rnă njrăng neh dak xă Việt Dân năm 2022, ngăn lah ăp nău geh hun hao wăng sa n’hanh ndơ̆  xă tâm di ƀon lan mhe bôk năp bah lam dak.

Groi Thủ tướng Phạm Bình Minh râng nar rgum lam ƀon lan mât uănh rnă njrăng neh dak ta Quảng Ninh.

Groi Thủ tướng đă gưl ủy, n’gâng kan ƀon lan, Ủy ban Mặt trận Tổ quốc Việt Nam ăp gưl, ăp rmôt kan rêh jêng ta n’gor Quảng Ninh uănh mĭn lơn tay gay “Nar rgum lam ƀon lan mât uănh rnă njrăng neh dak” nar rgum ngăn ngên hăn jru, rhŏ an săk rnglăy ăp nău kan chính trị-wăng sa, văn hóa-rêh jêng bah ƀon lan. Di rơh aơ, Groi Thủ tướng Phạm Bình Minh lĕ khâl, ăn ndơ ăp rnăk ntoh lư tâm ntrong leo mât uănh rnă njrăng neh dak ta xă Việt Dân; âk nsum mpôl n’hanh êng nuĭh dơi geh uĕh nău kan ntrong leo mât uănh rnă njrăng neh dak xă Việt Dân dơi sŏk bằng khen, sam ƀŭt rnê rhơn.

Nŭih blang: Y Sưng Phê Ja