“Năm 2023, lam dak năl geh 125 tơ̆ khêh ndơ sa, ƀư rlău 2,1 rbăn nuĭh khêh n’hanh 28 nuĭh khĭt, dŭt njrăng hŏ ntoh khêh tă bah clostridium botulinum”. Aơ lah nău lư ta rơh hop Ban rđău đă rgop âk n’gâng kan Trung ương mpeh đăp mpăn kloh uĕh ndơ sa tă bah Groi Thủ tướng Trần Hồng Hà ƀư tơm ôi 3/1, ta Nhih pah kan Chính phủ.

Ta rơh hop, Groi Thủ tướng Trần Hồng Hà dăn đă: Ban rđău đă ôp uănh  tay ăp tŏng lam lĕ rngôch, n’glôch jêh nău tĭng ƀư Luật đăp mpăn kloh uĕh ndơ sa năm 2010, ăp trong nchrăp jong, dăp rgum, trong nchrăp, bôk nău kan mpeh đăp mpăn kloh uĕh ndơ sa;  uănh gĭt na nê̆, ăp trong nkra, trong ntĭt leo mât đăp mpăn kloh uĕh ndơ sa mhe, dơn ngoăy bah Trung ương tât tâm dâng;  ntrôl dăng tâm pă gưl, tâm pă nău  dơi kan, hăn ndrel đah n’hao nău dơi đăp mpăn geh tŏng ndơ, tơm ndơ hăn ƀư. Groi Thủ tướng Trần Hồng Hà lah rjăp ân rgâl  mhe trong ƀư, trong nkoch trêng nău lư âk ntil, way ƀư mbro gay rgâl nău gĭt êng bah ăp gưl, ăp n’gâng kan, lơn lah tâm dâng, n’hanh nuĭh ƀon lan mpeh ăp nău gĭt mât đăp mpăn kloh uĕh ndơ sa; tâm ban kơt ăp rơh geh âk khêh, ăp nău tih mpeh đăp mpăn kloh uĕh ndơ sa hô./.