Tĭng nau tâm nar rƀŭn, lvang năm 2021-2025, ăp n’gor Tây Nguyên geh Trung ương jao rlau 11.700 rmen gay ma ƀư 3 bôk nau kan bah neh dak. Rnoh prăk aơ geh rlau 11,73% rnoh ntuh kơl hun hao bah Trung ương ân 3 bôk nau kan bah neh dak tâm lam dak. Êng năm 2022, trung ương pă rlau 3.878 rmen ndrel ăp n’gor Tây Nguyên hŏ pă rlau 870 rmen tơm prăk bah n’gor gay ƀư ăp nau kan. Tât lơ 31/12/2022, ăp n’gor tâm nkuăl mơ geh pă rlau 34% rnoh prăk Trung ương jao (dêh rlau nau trok prăk nsum bah lam dak).

Khay 1/2023, hŏ geh 3 tâm roh 5 n’gor lah Kon Tum, Lâm Đồng, Dak Nông ƀư jêh nau pă ntop tơm prăk bah năm. Ntơm bah nau ngăn bah nau nkol ta Tây Nguyên, rđau kan ăp n’gor hŏ đă du đê̆ nau kan gay ma Chính phủ uănh, Groi Thủ tướng Chính phủ Trần Lưu Quang đă ăp n’gor ơm ƀư jêh nau pă tơm prăk, dŏng prăk tâm di đah ăp nau kan, đă ăp ntŭk kan, n’gâng kan bah Trung ương ƀư rjăp nau kơp, ƀư jêh ăp nau ntrŭnh ê tŏng. Mpeh ăp nkuăl, Groi Thủ tướng đă lŏ ƀư ngăch ăp nau kan dôl ƀư, n’hao nau tâm rgop đah ăp n’gor ndrel ăp ntŭk kan Trung ương ndrel nau tâm rgop tâm ăp nau kan, rmôt kan bah nkuăl tâm nau ntrŭnh ƀư./.