Kêng măng 23/2, ta Nhih pah kan Chính phủ, Groi Thủ tướng Chính phủ Trần Lưu Quang ƀư tơm rơh tâm nchră n'glôch jêh pah kan năm 2022, an ƀư nău dơn kan năm 2023 bah Ủy ban đăp mpăn rnă njrăng trong trôk gưl neh dak. Năm 2022, lam dak geh rlău 600 tơ̆ nău tih đăp mpăn rnă njrăng trong trôk, hao rlău 400 tơ̆ rđĭl đah năm 2021; rnoh âk tơ̆ năch geh dun lăp âk; lơn lah hŏ geh 2 tơ̆ ntêt nkri lơh ndjơh.

Yơn lah ăp nău tih rnă njrăng trong trôk dơi nkra ngăch, mô an geh roh đăp mpăn đah ăp nău kan bah n'gâng kan trong trôk. N'glôch jêh ta rơh tâm nchră, Groi Thủ tướng Trần Lưu Quang nkoch kloh, ntrŏng năl mât đăp mpăn lam lĕ rngôch rnă njrăng trong trôk lah nău dơn kan chính trị khlay dâk bôk năp. Yor kơt nê̆, ăp n'gâng kan, ăp n'gor ân way nsrôih gay n'hao săk tam pah kan mât ŭanh, groi nđôi rnă njrăng, đăp mpăn. Nkre tĭng ƀư ăp kôp ăp trong nkra gay mât đăp mpăn rnă njrăng, đăp mpăn njrăng n'gang mpôl lơh ndjơh ta ăp ntŭk  ndơ dŏng kan an trong trôk.