Lơ 23/11, ta Ngih Chính phủ, Groi Thủ tướng Trần Lưu Quang ƀư tơm rơh rƀŭn bah Hội đồng uănh năl Dăp rgum trong ndrâm dak Ka, nkual njưh dêr phŭt an duk mpan ka rnôk 2021-2030, uănh tât năm 2050. Dự thảo Dăp rgum geh nău rƀŏng tât năm 2030, lam dak geh 173 ndrâm dak ka. Nkual miền Trung (bah Quảng Trị tât Bình Thuận) mbra lah ntŭk rgum âk ndrâm dak ka lam dak, đah 82 ndrâm dak ka.

Lam dak mbra geh 160 ntŭk njưh ndê dêr phŭt an duk mpan ka, tâm di nău ŭch an nklăp rlău 90.000 duk mpan ka. N’glôn jêh rƀŭn nchră, Groi Thủ tướng Trần Lưu Quang lah rjăp du nău way tơm tâm ndâk njêng dăp rgum, ta năp nĕ lah dự thảo Dăp rgum an tâm di đah ăp dăp rgum dôl geh tam; ăp nkô̆ nău mô hŏ tâm di mô lah geh nău tâm rkeh ri an dăn đă nkra di. Tâm nĕ, dăp rgum mhe an mkra ăp nău mpeh tâm nu nău ngăn, nkre an mĭn tât ăp nău mpeh trong hăn, trong nchrŏng an rgŏ năp kơt: rgâl mrô, rdâng đah rgâl trôk nar.