Wa Kpuih H’Joi, 40 năm deh ta ƀon Sung Kép, xă Ia Kla, nkuăl Đức Cơ, n’gor Gia Lai lah rnăk dơi geh bah bôk nău kan an manh prăk chính sách. Ta năp đaơ, rnăk wa H’Joi tâm rnăk ach o, nău rêh dŭt n’hâm jêr jŏt. Knơm dơi manh 80 rkeh prăk bah tơm prăk manh chính sách, rnăk wa H’Joi lĕ nkra jay gŭ n’hanh geh prăk ntuh kơl tăm 3ha điều ta neh mir bah rnăk wâl. Geh jay nâp nâl, geh mir gay mât chăm lĕ kơl wa H’Joi nsing nơm lơn gay hun hao wăng sa rnăk wâl.

 Rnôk bah năp mih ri tâm jay sŏk măm n’hanh xô gay dơ. Aƀaơ knơm ngih dak an manh mư dơi ƀư jay mhe kơt aơ dăn lah uĕh đŏng. Dơi geh jay đăp mpăn an pah kan jan sa an nău rêh uĕh lơn.

Xă Ia Kla, nkuăl Đức Cơ lah xă nkual 2, đah rnoh rnăk ach o n’hanh êp ach o âk, dŭt âk lah nuĭh rnoi mpôl đêt. Aƀaơ ta lam xă geh 1.056 rnăk dơi gĭt tơm prăk đah nkah rnon rlău 63 rmen prăk ta Ngân hàng chính sách xã hội nkuăl. Wa Hoàng Đức Anh, Kruanh UBND xă Ia Kla an gĭt:

Bah ăp tơm prăk manh mât uĕh nău rêh nuĭh ƀon lan, bah kônh wa ntơm hao n’hanh đăp mpăn. Xă mbra tâm rgop đah ngân hàng chính sách xã hội nkuăl gay ƀư ăp tơm prăk tĭng bôk nău kan an rêng hvi tât nuĭh ƀon lan, tât ăp nuĭh dơi geh gay m’hâm ƀư nău ŭch n’glêh dŭt lah n’hao nău rêh nuĭh ƀon.

Rnăk wâl ur sai yuh Siu Nhã (31 năm deh) n’hanh nô Đoàn Công Toàn (35 năm deh) gŭ ta tổ 6, nkuăl têh Chư Prông, nkuăl Chư Prông rlet rlău jêr jŏt knơm tơm prăk aơ. Năm 2022, rnăk wâl yuh Siu Nhã lĕ dŏng 80 rkeh prăk bah tơm prăk manh chính sách xã hội gay ntuh kơl hun hao nkra njêng. Yuh Nhã nkoch, mpŏng ŭch têh ngăn bah lĕ 2 hê ur sai rklaih ach o dôl jêng nău ngăn.

Bah năp đaơ rnăk wâl mô hŏ đăp mpăn kơt aƀaơ. Bah rnôk 2 hê ur sai manh prăk chính sách ri đah rnoh prăk nĕ mpôl hên ntuh kơl geh 1 ha cà phê đah 400 n’gâng tiêu, wăng sa bah rnăk wâl ntơm đăp mpăn. Gâp nsrôih đêt năm tât ri rklaih luh ach o n’hanh geh nău rêh tŏng ăp.

Wa Từ Ngọc Thông, Groi kruanh UBND nkuăl Chư Prông, an gĭt, tơm prăk manh chính sách mbơh ƀư ta nkuăl lĕ kơl rklaih luh ach o ăp năm hŭch 3%.

Manh chính sách xã hội lah ngoăy tâm âk trong mkra gay ƀư tĭng trong kan n’hŭch ach o nâp nâl. Đah ntĭm đă 40 năm 2014 aơ lah njoăt hăn mhe đah nău dŏng tơm prăk ngih dak gay ntop kơl, nta an geh tay prăk manh gay ƀư tĭng ăp bôk nău kan kơl an, manh prăk kon nuĭh. Tât aƀaơ mpôl hên lĕ hao âk gay ƀư tĭng ăp trong mpeh n’hŭch ach o nâp nâl ta ntŭk.

Tât aƀaơ, an manh chính sách lĕ ƀư tât ăp xă nkual jru ngai, lam n’gor Gia Lai. Dĭng lĕ an manh kơl an geh bơi 16.500 rmen prăk, đah rlău 500 rbăn rnăk ach o, rnăk êp ach o n’hanh ăp nuĭh dơi kơl gĭt manh prăk, tâm nĕ nuĭh rnoi mpôl đêt geh bơi n’gul. Bah nĕ, rnoh rnăk ach o bah Gia Lai lĕ hŭch bah rlău 23% năm 2024 jŭr hôm rlău 8% kơt aƀaơ. Wa Rah Lan Chung, Groi Bí thư n’gor ủy Gia Lai, an gĭt:

Tâm năm tât aơ tay, tâm rnôk mhe, tâm nău geh mhe, du đêt nkô̆ nău n’hanh ngăn ngên n’gluh an geh âk nkô̆ nău mô hŏ dơi tâm di. Yor nê N’gor ủy geh dăn đă đah Trung ương dăn đă ndâk njêng Nghị quyết bah Bộ Chính trị mpeh n’hao nău rđău bah Đảng đah nău ƀư an manh chính sách xã hội ta nkual lam dak lah nsum n’hanh Gia Lai gay m’hâm ƀư dŏng geh săk rnglăy tơm prăk, rgop ngăn ngen tâm nău ndâk njêng n’hanh hun hao neh dak kơt n’gor Gia Lai.

Knơm prăk manh ăp bôk nău kan an manh chính sách, Gia Lai lĕ geh âk njoat hăn jong ƀư tĭng ăp bôk nău kan rƀŏng tĭng lam dak mpeh n’hŭch ach o nâp nâl, ndâk njêng thôn ƀon mhe, hun hao wăng sa-rêh jêng nkual rnoi mpôl đêt n’hanh nkual yôk./.