Lôch âk năm ât rdâng đah khuch khat tă bah nô nău duh phang tâm kêng dŭt khay wai, ăp năm mhe aơ n'gor Kon Tum nsrôih an ƀư âk trong nkra gay rdâng lơh đah duh phang n'hanh hŭch bah ir khuch khat âk tâm nău kan tuch tăm. Nău nchih nkoch bah Phóng viên Khoa Điềm, way gŭ kan ta nkual Tây Nguyên ta nkuâl Sa Thầy, ntŭk lăp tâm kêng dŭt khay wai way geh suăt kroh dak tŏ an tơm tăm lơn lah neh tăm ba lŏ khay puh- wai.

Nklang khay duh phang bah khay wai Tây Nguyên, dâng sre đah rnoh hvi rlău 11ha bah nuĭh ƀon lan thôn Gia Xiêng, xã Rờ Kơi, nkuâl Sa Thầy, n'gor Kon Tum hôm nđĭr nse bah dâng sre khay puh- wai đŏng. Nô A Thun, kruanh thôn Gia Xiêng an gĭt, lĕ ma dâng sre nsing tâm du tơm dak tŏ bah dak bât thủy lợi Đăk Hlang. Gay rdâng lơh duh phang lah ân dŏng tơm dak mpêt nkrem n'hanh geh nău tam đŏng:

"Tâm rnôk dja dâng sre bah thôn Gia Xiêng dak hôm ăp tŏng đŏng. Săk gâp nơm ăp tơ̆ rơh hop thôn nkoch trêng an kônh wa gay tâm pă tơm dak an tâm di đŏng. Ân n'hao tĭng kơn, tĭng kơn, kơn prêh, kơn dêh an tâm di. Săk gâp nơm way hăn chop uănh n'hong dak hoch tât tơm dak bât, rgum kônh wa kuar rvach n'hong gay tŏng dak tŏ tâm khay puh- wai dja".

Ndrel đah nău dŏng tơm dak mpêt nkrem n'hanh geh nău tam, gay hŭch bah ir khuch khat đah rnoh neh tăm ba lŏ khay puh- wai tă bah duh phang kêng dŭt khay wai lơh, ta ăp xã, kơt: Sa Nghĩa, Sa Bình, Ya ly… bah nkuâl Sa Thầy hang rhiăng rnăk hŏ rgâl jêng tăm tơm mbo, bum blang, biăp … rgâl an tăm ba rnôk geh rnôk mô. Rnăk geh 5 sào lŏ, wa Phan Lương, thôn Hòa Bình, xã Sa Nghĩa an gĭt, nkra bah nău mô tŏng dak tŏ khay puh- wai, bar pe năm aơ păng rgâl 3 sào jêng tăm mbo, săk geh wăng sa nsĭt tay hôm âk rlău tơm ba:

 "Tăm mbo rđĭl đah tăm ba lŏ ri dơh lơn yor ba lŏ ăp nar he ân hăn chop uănh lơn lah khay puh-  wai gay n'glăp dak hoch. Hôm tơm mbo 10 nar he mơ an n'glăp dak du tơ̆. Nău tâl bar mât chăm dơh lơn đŏng, mô lăng geh tu ndrŭng chuh sa. Ntĭt kơt bu tuh nđôch, ndrŭng ăp ntil ri đêt lơn ba. Play tăch, tâl bar thor mbo rêh an bu ƀư chả ram. Nău tâl pe lah tăch tơm, 1.000m2 ri êng tăch tơm kro geh bơi 1 rkeh prăk. Tăm mbo rđĭl đah ba lŏ ri nsĭt tay nău geh wăng sa âk rlău bar tơ̆".   

Nkuâl Sa Thầy lah ntŭk kro phang tơm bah n'gor Kon Tum, ăp năm djăt ma tât kêng dŭt khay wai nău mô tŏng dak tŏ an tơm tăm lơn lah neh tăm ba lŏ khay - puh wai hôm geh tay đŏng. Geh năm duh phang ntoch jong, nuĭh ƀon lan bah nkuâl roh dơm bar pe jât ha. Wa Giả Tấn Đạt, Kruanh jrô kan tuch tăm n'hanh hun hao ƀon lan nkuâl Sa Thầy, an gĭt nơm geh tĭng ƀư du rơh âk trong rdâng lơh đah duh phang jêng nkuâl hŏ hŭch âk rơh khuch khat tâm nău kan tuch tăm:

"Đah ăp neh tăm mô geh n'glău dak tŏ tâm pă nar khay tăm ơm lơn, lơn lah dăp rgum tơm tăm glêh nar. Du đêt nkual mô geh nău dơi ƀư dak bât rgâl jêng tơm tăm neh kơh kơt bum biăp, mbo n'hanh du đêt ntil tơm tăm  êng ƀa ƀă. Bah meng nê ri nkoch trêng, rđău đă ăp xã, thị trấn nsrôih dŏng ăp tơm prăk nău kan tuch tăm gay kuar rvach, mbluh soih n'hong dak, bât jĭr ntŭk đang hoch ăp n'glău dak bât. Kan nsum đah Trạm thủy nông gay tâm pă dak an tâm di n'hanh nkoch trêng nuĭh ƀon lan dŏng tơm dak mpêt nkrem"./.