VOV4.M'nông: Gay nking nchăng nău lơh joi choih, tâm ăp năm rlău aơ n'gor Kon Tum hŏ ƀư tâm rlong ndranh, pă an si ƀŭt rhôp choih ta âk tơm ta ăp dak me. Bah meng nău nsĭt geh bah nău năl kloh rvah ri ta âk ntŭk lơh joi choih dja hŏ ntoh âk nău tih ƀư jêng nuih ăl. Nkô̆ jêng tât nău dja lah tă bah nău mât njrăng lơh joi choih geh nău mƀơk lhoi bah tâm dâng, mô dơn nê ma hôm geh nău mpơl tâm mpôn mo an nău tih đŏng.  

          Ntŭk lơh joi choih ta dak me Pô Kô, gâl dja hoch rlău ƀon Kà Nhảy, xã Đăk Nông, nkuâl Ngọc Hồi dơi UBND n'gor Kon Tum an si ƀŭt lơh joi choih ntơm bah khay 11/2018 an Công ty TNHH Một thành viên Lĩnh Vũ. Tĭng nău lah bah nuĭh ƀon lan ta ntŭk, ntơm bah rnôk mô hŏ an doanh nghiệp dja dah ma rhôp êng choih, nhuĭh êng du trong hăn jong nklăp 100m njok dak me Pô Kô hăn rlău neh bah 10 rnăk ƀon lan dôl dŏng. Wa Lê Văn Kha rlăch dun nău dja ri geh wa A Veo nuĭh tơm choih jă mpôl hăn nkri lơh. Nô Kha an gĭt, nău dja tât aƀaơ nha mô hŏ dơi nkra đŏng:

        “Gâp saơ du trong hăn kơt nê̆ lah gâp jŭr gâp sŏk n'gâng chŭt n'gar tay neh gâp lah wa A Veo leo mpôl jŭr lơh nkri gâp. Tâm rnôk nê geh bar cán bộ uănh saơ lơh nkri gâp, gâp mô nănh mbơh săk. Gâp dăn jŭr tât  xã, Ủy ban xã tâm ban kơt mpôn mo tĭng trong nsĭt geh an wa Veo”.

        Ntơm bah nău tih mô geh nking nchăng aƀaơ hôm geh si ƀŭt pă  an lơh joi choih đŏng, Công ty TNHH Một thành viên Lĩnh Vũ geh tay ăp nău kan lơh khuch tât nău rêh bah nuĭh ƀon lan, kơt: mô ƀư di nău way lơh joi di mông nar; rnôk rdeng choih tâm khay wai ri ƀư n'huk djơh, khay mih ƀư trong rhuh mbĭr. Mô dơn nê doanh nghiệp dja hôm dah rŏng ma sŏk neh lŭ bôr n'hong dak bah trong Hồ Chí Minh gay dơh an ndeh rdeng choih rsong hăn. Nô Lê Văn Tường gŭ dăch kêng trong rdeng choih bah tơm bun choih bah doanh nghiệp luh trong Hồ Chí Minh, rvê:

       “Lah ndeh têh, ndeh 4 jâng chuăt n'gâr đang lĕ ma jay ri ur, kon măng bĭch lah klach rvê. Hôm n'huk djơh ntŭk gŭ rêh đŏng. Jay hên ntĭl mpông mbro mô geh rnôk nănh pơk mpông. Bah năp trong Hồ Chí Minh, ntơm nơh geh ndơ lăk, aƀaơ ndeh jot hăch rlâm lĕ. Rdeng neh, lŭ bôr tay khay mih lah dak ngâr băm tât mpông jay gâp".

        Ndrel đah khuch tât nău rêh bah nuĭh ƀon lan, ta du đêt ntŭk tơm lơh choih ta n'gor Kon Tum hôm geh âk nău tih hô đŏng.

        Ntih kơt ta ntŭk rhôp luh, choih ta dak me Đăk Pxi, gâl hăn rlău thôn 7, xã Đăk Pxi, nkuâl Đăk Hà. Tĭng si ƀŭt an lơh joi lŭ choih mbrô 898, nar 15/9/2020 UBND n'gor Kon Tum pă an, ri Công ty TNHH 87 dơn lơh joi ma trong rhôp dơm.

        Ndrĭ yơn doanh nghiệp dja hŏ dŏng ndeh rklư têh kuĭh bât êng du trong hăn jong hang rhiăng met n'glah bar ding trong dak me gay rhôp choih ƀư rgâl n'hong hoch. Nău dŭt mha êng lah bol ma ntŭk rhôp choih dơn ngai đah nhih pah kan UBND xã Đăk Pxi nklăp rlău 1km, yơn wa Trần Phước Tuấn, Kruanh UBND xã lah rjăp mô saơ geh nău tih:

       “Ta mpeh xã ri way rđău đă oh nô lah hăn tĭng uănh groi nđôi ma aƀaơ mô hŏ geh ban saơ du ntil nău tih"

        Mpeh jrô kan Tài Nguyên n'hanh Môi trường nkuâl Đăk Hà, wa Đinh Khánh Hoàng, Groi kruanh Jrô kan an gĭt, ta ntŭk lơh joi choih ta dak me Đăk Pxi, gâl hoch rlău thôn 7, xã Đăk Pxi bah Công ty TNHH 87, đơn vị geh saơ nău tih yơn nklăp tă bah mô klăp ndăng đah doanh nghiệp jêng Jrô kan nchih si ƀŭt nkah dơm:

       “Ntĭt kơt khân păng dơn đăng ký duk, mpun, máy rhôp dơm tâm rnôk geh n'glăp máy kuĭh jŭr đŏng ri mpôl hên rmal nchih si ƀŭt nkah âk tơ̆. Hôm nău ƀư trong gay ma njŭr ndeh hăn kan ta nê ri hŏ nkah hôm hŏ đă UBND xã ôp uănh. Tât aƀaơ mô hŏ rmal du tơ̆ nău tih đêt".

          Tâm rnôk nê lôch ôp uănh si ƀŭt lơh joi choih n'hanh rup gui ban saơ ta ntŭk lơh, wa Võ Thanh Hải, Groi Giám đốc Sở Tài Nguyên n'hanh Môi trường n'gor Kon Tum hŏ lah rjăp, ăp nău tih geh ta tơm choih dŭt hô ân tât rnoh âk rmal sŏk mplơ̆ si ƀŭt an kan:

         “Tâm quy định dơi an păng rhôp dơm mô dơi njŭr máy n'gôr, jêng lah máy kuĭh ta nklang dak me gay rhôp choih mô dơi an ƀư đŏng ma dơn rhôp hao ta duk mpun dơm, bah duk mpun rhôp tât kơh bun. Ƀư trong ta nklang dak me n'hoch trong hoch lah tih hôm, aơ lah nău tih mbơh uănh năl nău tât khuch ntŭk gŭ rêh n'hanh tih tâm nău lơh joi lŭ choih. Tih lĕ ma nău dja sŏk mplơ̆ si ƀŭt an lơh joi"

          Nău lư bah Sở Tài Nguyên n'hanh Môi trường n'gor Kon Tum an saơ, nău tâm pă gưl lơh joi lŭ choih ta n'gor Kon Tum lah dŭt kloh rvah. Rêng mât uănh dŭt lhăt đŏng. Djăt ma tât nar pe ăp pơh, ăp khay n'hanh ăp quý UBND ăp nkuâl, nkual ƀon têh ân mbơh đah Sở Tài Nguyên n'hanh Môi trường mpeh nô nău pah kan mât uănh  bah n'gor. Ndrĭ yơn i ngăn ăp ntil dôl geh ta âk ntŭk tơm choih lơh joi ta n'gor Kon Tum an saơ, nău mât uănh rnôk lơh joi, ơm hŏ dơi tâm pă gưl an âk ntŭk tâm dâng dôl geh mƀơk lhoi, mô dơn nê hôm geh nău mpơl mpôn mo, kơl an nău lơh tih đŏng.

Nuĭh rblang: Điểu Thân