Bôk nau kan ntŭk mât rong sur tĭng trong kan prêh mhe ndrel tăm tơm rgum nsum dôl geh Công ty cổ phần Thiên Thành Tài ntrŭnh ƀư tâm thôn Khơk Klong, xã n’har bri Rờ Kơi, nkuăl Sa Thầy, n’gor Kon Tum. Tĭng rđau kan Công ty aơ, bôk nau kan rgum ƀư rlau 21 ha neh, rnoh ntuh kơl 165 rmen. Nkô̆ nau bah nau kan lah du năm rong 2 tŏ sur sŏk puăch, đah rnoh 48 rbăn mhâl. Ndrel ma nê lah nau rklaih trong hoch ndŏk, tơm tăm rgum đah nau geh ăp năm nklăp 300 rmen ndrel pă kan pah ân nklăp 100 nŭih. Wa Phạm văn Thành, Kruanh Hội đồng quản trị Công ty Cổ phần Thiên Thành Tài mbơh, tâm nau ƀư kan, Công ty mro ndơn geh nau kơl an bah n’gâng kan ndrel ntŭk kan bah n’gor Kon Tum:

‘Phung hên ntrŭnh nau ntuh kơl tâm rnôk aơ geh nau kơl an âk ngăn bah UBND n’gor Kon Tum kŏ kơt lah bah UBND nkuăl Sa Thầy hŏ pơk trong ân Công ty tâm rnôk hăn uănh, săch ntŭk kŏ kơt lah tâm nau kan rklaih ntrơn ntŭk. Tal bar lah ăp n’gâng kan, ntŭk kan kŏ pơk trong ân Công ty tâm nau ƀư jêh ăp nau kan gay ma Công ty mra dơi ntrŭnh tâm rnôk ơm ngăn”.

 Gay rgum ăp tơm ntuh kơl pơk trong ân nau hun hao văng sa, rêh jêng, jêh Đại hội Đảng bộ n’gor Kon Tum tal XVI tâm khay 9/2020, n’gor Kon Tum rgum rgâl nau ntuh kơl, n’hao nau mbơh mpeh ăp nau kan jă tơm ntuh kơl ndrel rgum nau dơi hăn nsum ma ntŭk ƀư kan. Gay ma rgâl, rklaih nhăn ăp nau kol bah tơm ntuh kơl, UBND n’gor Kon Tum ƀư bôk nau kan “Cà phê ntŭk ƀư nau kan tăch rgâl, nŭih ƀư nau kan tăch rgâl” tâm pơh bah năp nê; ƀư “Rơh tâm nchră đah ntŭk kan tăch rgâl” du năm 2 tŏ. Ndrel ma gưl n’gor, tâm 2 nkuăl văng sa tơm, n’gâng kan nkual ƀon têh Kon Tum ndrel nkuăl Kon Plông kŏ mât nau ƀư tâm mâp, tâm nchră, tâm kơl ân ntŭk kan joi tât nau ntuh kơl kŏ kơt lah nau ê nkra, tăch rgâl. Wa Nguyễn Thanh Mân, Kruanh UBND nkual ƀon têh Kon Tum, ngơi:

‘Rnôk ăp tơm ntuh kơl tât mĭn ri nkuăl ƀon têh mra rgum gay ma ƀư tĭng ăp ntrong nau kan ma ăp tơm ntuh kơl kơl an, kơt lah mbơh mpeh ntuh, mbơh mpeh nau ƀư ăp nau kan. Nkuăl ƀon têh ndrel ăp n’gâng kan, ntŭk kan ndơn ăp nau tât gay ma kơl tâm nchră ân UBND n’gor pơk trong nơih lơn ngăn ân ăp tơm ntuh kơl. Lah ma tơm ntuh kơl geh nau jêr ri nkuăl ƀon têh mra lah ntŭk dâk bôk năp gay ma ntơm leo rklaih nau kan mô ân nŭih ntuh kơl joi uănh”.

Đah âk nau kan ngăn, jêh rlau 2 năm ƀư nau ntrŭnh Đại hội XVI Đảng bộ n’gor, Kon Tum hŏ rgum geh 68 nau kan ntuh kơl, đah rnoh đăng ký rlau 18 rbăn rmen. Nau ngăn lah mô knŭng tâm nkuăl geh nau nơih, nkre tâm ăp ntŭk nkual jru, ngai, nkuăl rnoi mpôl đê̆ hôm nau jêr kơt Tu Mơ Rông, Đăk Tô, Sa Thầy...kŏ geh rgum ntuh kơl đah âk nau kan geh ƀư ngăn. Wa Huỳnh Thị Thuý Hà, Groi Giám đốc N’gâng kan nchrăp kan ndrle ntuh kơl n’gor Kon Tum, mbơh n’gor dôl jă ăp tơm ntuh kơl tâm ăp nau kan, kơt ê nkra dak si, ê nkra công nghiệp, ŭnh nar ndâk njêng tay, pâl n’aih, tuch tăm prêh mhe...Ndrel gay Kon Tum jêng ntŭk drâm bah ăp tơm ntuh kơl, n’gor dôl nsôih rgâl nau ntuh kơl tăch rgâl:

‘N’gor uănh năl nau ntrơn rgâl ntuh kơl, tăch rgâl, kơl an ntŭk kan tăch rgâl lah du nkô̆ nau khlay gay nơm rgum nau ntuh kơl, hun hao văng sa, rêh jêng bah n’gor. N’gor uănh khlay ntrŭt dăng nau rgâl mhe hành chính. Ăp gưl, ăp ntŭk kan ntrŭt dăng nau rklaih nau kan ƀư săm ƀŭt hành chính đah ăp nau kan hŏ geh tơm ntuh kơl gay ma ăp ntŭk kan ơm ntrŭnh ƀư nau kan năn ndrel geh săk tam. Nsôih ngăn pơk trong nơih ân nau rgum ăp tơm ntuh kơl têh geh nau dăng, nsôih ŭch kơl an bah n’gor”.

Gay ndâk ntŭk ntu ntuh kơl ân tâm ban, kloh, tâm di pháp luật, n’gor Kon Tum rnôk aơ kŏ dôl sôih rklaih ăp nau nkol, nau ê dơi tâm ăp nau kan ma nŭih ntuh kơl mô dơi geh ton ƀư. Nkre lah, nsôih rlaih ân rjăp ăp nŭih, ntŭk kan geh nau ƀư jêr, nau ƀư nkol tâm rnôk hăn joi nau kan ma geh ntuh kơl, joi uănh tâm n’gor./.