Răk samƀŭt ta ƀư nkah gĭt, wa Dương Văn Trang, Ủy viên Trung ương Đảng, Bí thư N’gor ủy Kruanh HĐND n’gor Kon Tum nkah tay lịch sử, nău way ơm têh dăng bah n’gor Kon Tum tâm 110 năm ndâk njêng n’hanh hun hao. Đah ntŭk ntô kan khlay, tâm nar 9/2/1913 Toàn quyền Đông Dương an Nghị quyết ndâk njêng ntŭk kan hành chính n’gor Kon Tum geh du nkual têh hvi ta nkual bah lơ Tây Nguyên gay n’hao mât uănh n’hanh joi bri dak.

Mô ŭch ƀư dĭk an rlăng Pháp, Nuĭh ƀon lan ăp rnoi nuĭh n’gor Kon Tum lĕ janh dăng dâk hao, tâm rnglăp dun tay nău rŭn in bah rlăng. Đah nău luh bah Chi bộ n’gor ta dŭt khay 9/1930, Kon Tum lah ntŭk bôk năp ta Tây Nguyên ndâk njêng rmôt Đảng Cộng sản. Rlău 2 rơh tâm lơh dun n’gang rlăng Pháp n’hanh Mỹ, tahen n’hanh nuĭh ƀon lan n’gor Kon Tum đah nău rđău bah Đảng lĕ janh dăng ndrel nuĭh ƀon lan lam dak ndâk njêng ăp trong rdôl lơh rgop an Lơh dăng Mùa Xuân năm 1975 kơp dơn neh dak.

Aƀaơ, n’gor Kon Tum geh 10 ntŭk kan hành chính gưl nkuăl đah rnoh nuĭh bơi 590.000 nuĭh. Ngăch hao jêng wăng sa bah n’gor ta rnoh âk; Trong wăng sa rgâl tĭng trong uĕh; Rnoh rnăk ach o hŭch hôm e bah dâng 11%; nău rêh drăp ndơ n’hanh nuih n’hâm bah nuĭh ƀon lan dơi hao. Ntô̆ n’hao mpeh nău way ơm cách mạng têh dăng bah n’gor Kon Tum lôch tâm 110 năm ndâk njêng n’hanh hun hao, Ủy viên Trung ương Đảng, Bí thư N’gor ủy, Kruanh HĐND n’gor Kon Tum, Dương Văn Trang mĭn lah:

 “Ndrel đah lam dak, n’gor Kon Tum dôl nâp jâng tâm trong hăn ndâk njêng n’hanh mât njrăng neh dak. uănh tay trong hăn 110 năm têh dăng, lơ ƀư an he wât n’hanh ntô̆ n’hao lơ đah nău lĕ rlău, gĭt wât uănh lah aƀaơ, nsing nơm nâp nâl ta trong hăn ang tĭng trong ma Đảng, Wa Hồ n’hanh Nuĭh ƀon lan he lĕ săch. He ŭch ƀư an ntoh lư rnoi nuĭh mro mrăng, tâm di đah u che rbăn năm lĕ roh nting mham gay dơi geh nău rƀŏng ndâk njêng neh dak Việt Nam xã hội chủ nghĩa “ƀon lan ndrŏng, neh dak têh dak, ƀon lan ƀư tơm, tâm ban, uĕh lăng”.

Ntoh ngơi ta ƀư nkah gĭt 110 năm nar ndâk njêng n’gor Kon Tum, Ủy viên Bộ chính trị, rnâng kan Ban Bí thư Trung ương Đảng Võ Văn Thưởng lah rjăp: Kon Tum lah nkual ndrŏng âk lịch sử, văn hóa. Rlet rlău âk nău têh bah lịch, ƀon lan ăp rnoi nuĭh n’gor Kon Tum lĕ ndâk njêng, mât ndrăy, mât uĕh nuih n’hâm rŏng dak, tâm rnglăp, gơih nđơr, mĭn ƀư mhe, janh dăng, du nuih n’hâm tĭng Đảng, tĭng Wa Hồ ƀư cách mạng, rgop ƀư ntô̆ n'ha’ janh dăng bah rnoi nuĭh he n’hanh nkual neh Tây Nguyên.

Gay n’gor Kon Tum hun hao ngăch, nâp nâl, Rnâng kan Ban Bí thư thư Trung ương Đảng Võ Văn Thưởng pơk hvi du đêt nkô̆ nău gay ăp gưl ủy, rmôt kan đảng, n’gâng kan ƀon lan, Mặt trận Tổ quốc, nsum mpôl n’gor Kon Tum uănh tât tâm năm tât, nĕ lah:

“Ăp gưl ủy, rmôt đảng, du hê cán bộ, đảng viên n’hanh du hê ƀon lan ăp rnoi mpôl đêt tâm n’gor an wât tŏng ăp nău ƀư, ntŭk gŭ, nău dơi geh, nău dơh, ndrel ăp jêr jŏt, ntŭl rlong, rhoăt nău blău ơm khlay tâm nău kan njrăng n’gang rklaih đăp mpăn rnoi nuĭh, ndâk njêng n’hanh mât njrăng ƀon tơm ăp năm bah năp; mât uĕh nău way ơm văn hóa, lịch sử, cách mạng bah n’gor, rdâk hao têh dăng nău mĭn, nău ŭch hao, rgâl jêng soan dăng, jêng nău ƀư na nê̆ bah ăp rmôt đảng, bah ăp cán bộ, đảng viên n’hanh nuĭh ƀon lan, ndrel soan, ndrel nuih n’hâm, rlet rlău ăp jêr jŏt ndâk njêng ƀon tơm Kon Tum hun hao ngăch, nâp nâl n’hanh uĕh lăng lơn”.

Ndrel đah nĕ rnâng kan Ban Bí thư Trung ương Đảng Võ Văn Thưởng đă đŏng n’gor Kon Tum rgâl mhe ntrong kan hao jêng, rgâl têh dăng rgâl trong wăng sa tĭng trong hun hao tâm di lĕ trong jru hvi gay hun hao nâp nâl, mât njrăng ntŭk ntô; tâm di đah rgâl trôk nar; an mĭn mât rƀăy n’hanh mât uĕh nău khlay lịch sử, drăp ndơ văn hóa ăp rnoi nuĭh, hăn ndrel đah hun hao pâl nđaih; rgum nkoch trêng, rgŏ jă ƀon lan jŭt jăng ăp nău rluk mâl, mô tâm di; rdâk hao ntô̆ n’hao, nău mĭn, nău ŭch hao bah ƀon lan ăp rnoi mpôl tâm ndâk njêng n’hanh mât njrăng ƀon tơm, neh dak; uănh tât nâp nâl bri dak, mât đăp mpăn rnă njrăng chính trị, đăp mpăn nău rêh jêng ta ntŭk...

Ta ƀư nkah gĭt 110 năm Nar ndâk njêng n’gor, n’gor Kon Tum lĕ mbơh n’hanh wơt dơn nău ntrŭnh bah Thủ tướng Chính phủ kơp dơn Nkual ƀon têh Kon Tum lah Đô thị loại 2 mpeh tâm n’gor. Jêh gưl ƀư nkah gĭt geh bôk nău njroh mprơ đah bôk nău “Hăn let mpeh măt nar” n’hanh pănh pháo nkao mbah rhơn n’gor Kon Tum 110 năm ndâk njêng n’hanh hun hao./.