Gay hŭch bah nău tât rmok dak ta kon se, tâm 2 nar aơ ( 6-7/8), ta nkual ƀon têh Kon Tum, Sở Văn hóa, Thể thao n’hanh Pâl nđaih n’gor Kon Tum ƀư tâm rlong nău blău njrăng, n’gang rmok dak an kon se năm 2024. Tâm rlong nău blău njrăng, n’gang rmok dak an kon se n’gor Kon Tum năm 2024 geh nău tât râng bah 6 rmôt đah rlău 180 nuĭh tâm rlong.

Lĕ rngôch ăp nuĭh tâm rlong tâm druh ndăm rchong tiăr nti re ta ăp ntŭk ntĭm nti,  ntŭk rgum pâl druh ndăm rchong n’hanh Câu lạc bộ re ta n’gor. Tâm 2 nar râng tâm rlong, ăp kon se tâm rlong nău blău re mplơt n’hanh nuih n’hâm nsum mpôl; nău blău jŭr dak kơl rêh nuĭh rmok dak bah kalơ kơh;  nău blău kơl rmok dak jŭr na nê̆; nău blău đông mplơt dŭt blău; nău blău nsoh ao đông tâm di n’hanh tâm rlong joi gĭt re đăp mpăn tĭng trong ƀư rung chuông vàng.