Nai Đào Thị Huyền, nai ngih sam ƀŭt tiểu học Ea Trul, xă Ea Trul, nkuăl Krông Bông lĕ rlău 24 năm tĭng đah nău kan ƀư nai an gĭt, pah kan ta ntŭk jêr jŏt, 75% kon hŏk lah oh kon rnoi mpôl đêt jêng ăp năm kơt nĕ, djăt tât bôk năm nti lah ăp nai bah ngih sam ƀŭt lŏ kơp uănh săk tât ăp jay rgŏ jă kon hŏk tât jrô nti.

“Tâm rnôk kon hŏk hăn nti ăp oh way rlu nti yor nkô̆ nău rêh jêng rnăk wâl jêr jŏt, me bơ̆ hăn kan ngai mô mât uănh ăp oh jêng rnôk rlu, jêng nai chủ nhiệm tât jay ăp oh gay rgŏ jă an ăp oh hăn nti, mpŏng ăp oh gĭt rplay sam ƀŭt. Tâm rnôk hăn ntĭm gâp ƀa ƀơ tât jay rgŏ jă oh hăn nti n’glêh dŭt rgŏ jă oh hăn jrô nti hăn nti ƀa ƀơ lơn”.

Wa Nguyễn Văn Tiến, Hiệu trưởng ngih sam ƀŭt tiểu học Ea Trul, xă Ea Trul, nkuăl Krông Bông an gĭt, năm nti aơ, ngih sam ƀŭt geh bơi 650 kon hŏk. Ngih sam ƀŭt nsrôih 100% kon hŏk tât jrô nti tŏng ăp. Gay dơi geh nău rƀŏng n’gluh an, rlău ma nău ndâk njêng trong nchrăp, ƀư rƀŭn nai chủ nhiệm, tâm pă tâm rgop đah n’gâng kan ƀon lan nsum mpôl rgŏ jă kon hŏk geh nău rêh jêr jŏt gay ăp oh đăp mpăn nti nsơm. Wa Nguyễn Văn Tiến nkoch:

Ngih sam ƀŭt tâm rgop đah n’gâng kan ƀon lan, ăp rmôt kan lŏng bôk tôr ntop kơl an 50 kôp ndrôm sam ƀŭt giáo khoa jrô 4, 500 blah kho ao. Đah N’gâng kan ntĭm nti n’hanh Công ty sách thiết bị ngih sam ƀŭt Dak Lak ntop kơl an 10 oh kon hŏk jrô 1 10 ndrôm sam bŭt. Bah meng nĕ, ngih sam ƀŭt lĕ tâm rgop đah rmôt me bơ̆ lĕ rwăt 500 ndrôm sam ƀŭt nchih n’hanh 1 đêt mâng nchih gay năp an ăp mon ntơm bah bôk năm lah ăp mon mô hŏ geh ndrôm sam ƀŭt gay nti nsơm tâm năm nti 2023-3024”.

Tĭng wa Huy Viết Trung, Kruanh jrô ntĭm nti nkuăl Krông Bông, tât aƀaơ lĕ rngôch ăp ngih sam ƀŭt lĕ nchrăp an năm nti mhe. Ndoh ndơ, rmôt nai ntơm tŏng ăp, tâm di nău ŭch tĭng bôk nău ntĭm nti phổ thông mhe. Kon hŏk ăp gưl ta nkuăl tât jrô ntơm tŏng ăp. Yơn lah, gay ăp oh hăn nti ƀa ƀơ, Jrô kan ntĭm nti nkuăl lĕ an sam ƀŭt ntĭm rđău ăp ntŭk ngih sam ƀŭt nsrôih tâm rgop đah gưl ủy, n’gâng kan bvbon lan ta ntŭk ndrel lăp nkoch trêng an me bơ̆ kon hŏk đăp mpăn, nta an oh kon tât jrô nti. Wa Huỳnh Viết Trung an gĭt:

“Rgŏ jă kon hŏk hăn nti ta ăp nkual jêr jŏt ntơm tŏng ăp, hôm du đêt mpôl hên lĕ tâm rgop đah n’gâng kan ta ntŭk ăp ngih sam ƀŭt gay mĭn uănh ntĭm rđău. Tĭng trong nchrăp lah 15/8 lôch săch nti, yơn rĭ mpôl hên hôm e ndruch nar n’hanh đê̆ đŏng tât nar 5/9 ăp oh mô hŏ tât jrô nti hôm e rgŏ jă tay ăp oh hăn nti gay đăp mpăn nău ăp oh tât ngih sam ƀŭt tŏng ăp”.

Đah ăp na nău kan ntĭm nti nkuăl Krông Bông, n’gor Dak Lak tâm trong kan rgŏ jă kon hŏk hăn nti dâl ntơm bah ăp nar bôk năm nti mbra mbơh uĕh an năm nti mhe geh săk rnglăy âk./.