Rnăk wa Hoàng Trung Thành geh 8 sào neh tăm cà phê ndrel ma sầu riêng tâm thôn Tân Sơn, xã Ea Yông. Ntŭk aơ geh n’gul lah nau nkra trong hăn ngăch Khánh Hoà-Buôn Ma Thuột. Wa mbơh, dơi gĭt rlau 4 sào cà phê bah rnăk wa geh bu sŏk gay ma nkra trong ri ŭch đŏng, yor aơ lah nau ntrŭnh bah Đảng, Ngih dak. Trong aơ jêh mra rgop nau ƀư hun hao văng sa, rêh jêng mô êng ân nkuăl Krông Pách ma hôm lam n’gor Dak Lak mô lah lam nkuăl Tây Nguyên. N’gul năm 2022, cán bộ địa chính tât pâng n’gâng, ndrel êp tết 2023 mhe rlau ri tât veh, kơp ndrel nkra săm ƀŭt trích luch gay ma ƀư nau trok tâm gay ntrơn ntŭk. Wa Hoàng Trung Thành, ngơi:

            ‘Ăp cán bộ bu tât kơp uănh, mbơh ân ƀon lan, hên leo bu tât ntŭk neh geh bu sŏk lơi, bu nthăng rse, pâng n’gâng ntơm bah bôk tât lôch, kơp tơm jêh aơ bu trok. Ăp ding bu tâm rgop gay ma veh, kơp ndrel ma rnăk hên ri saơ geh nau tâm ban tâm di đŏng”.

            Tâm thôn Tân Sơn, xã Ea Yông, rnăk wa Lê Đình Thiên kŏ geh 4 sào neh tăm cà phê nsum ma tiêu, tâm neh aơ bu sŏk ¼. Wa Thiên nkoch, nau ntrŭnh bah Đảng ndrel Ngih dak si rnăk hên ndơn tĭng. Wa ŭch ƀư nau kan trok tâm geh rah vah, kloh, der nau khuch ân ƀon lan. Wa Lê Đình Thiên mbơh:

            ‘Kơt lah tâm thôn ri âk ntŭk rnôk aơ 500-600 rkeh/sào, nê lah mir bu geh âk sầu riêng, âk ntŭk tơm tiêu, cà phê geh rnoh dêh lơn ri 300-400 rkeh/sào. Trong hăn ngăch nê nkra geh trok tâm ân tâm ban ri jêr, yơn kônh wa knŭng ŭch lah tâm ban, mô lah dêh lơn kŏ ân geh 70-80% ri kônh wa hên ŭch đŏng”.

            Xã Ea Yông, nkuăl Krông pách geh 193 blah neh bah 107 rnăk ndrel ntŭk rƀŭn chroh tâm Bôk nau nkra trong Khánh Hoà-Buôn Ma Thuột. Rnoh neh bu sŏk lah 250.672 m2. Wa Nguyễn Phụng Minh-Kruanh UBND xã mbơh, rnôk aơ geh 192/193 blah geh veh, lôch nau kan kơp uănh kŏ kơt lah ƀư jêh, kơp uănh kŏ kơt lah dôl ƀư nau jao jêh săm ƀŭt ân Ntŭk kan hun hao tơm neh tâm nkuăl Krông Pách gay ntơm ƀư nau ndâk ăp nau kan trok tâm:

            ‘Phung hên jao dĭng lĕ săm ƀŭt geh tât nau kan ân Ntŭk kan veh kơp neh bah nkuăl. Ntơm bah nê, du gưl bah ntŭk kan mra geh kơt rnoh ndrel ƀư jêh săm ƀŭt leo lir tâm xã ân kloh rah vah rơh 1, jă kônh wa tât uănh. Lah geh rnăk mô tâm di nau rơh 1, phung hên lŏ ntrơn nau đă nê ân nkuăl gay ma rgâl, jêh nê nchih lir tal 2. Ndrel jêh rnôk mbơh tal 2 ma kônh wa bu ndơn ri mô hôm geh nau đă ôh, ri nơm ƀư ân rjăp tâm rơh 3 ân kônh wa hăn ndơn prăk”.

            Bôk nau kan nkra trong Khánh Hoà-Buôn Ma Thuột geh rnoh jong bơi tât 118 km, hăn rlet 4 nkualư bah n’gor Dak Lak, geh: Krông Pách, Krông Bông, Ea Kar ndrel Mdrak ndrel nkuăl têh Ninh Hoà bah n’gor Khánh Hoà. Tâm nê êng tâm nkuăl Krông Pách geh jong ngăn rlau 33km, hăn rlet 8 xã, geh: Hoà Đông, Ea Knuêc, Ea Yông, Ea Kênh, Hoà Tiến, Tân Tiến, Ea Uy ndrel Vụ Bổn. Rnoh jong neh geh sŏk rlau 200 ha ndrel nklăp 200 ha trong nkra bah rlau 1000 rnăk ndrel du đê̆ ntŭk.

            Wa Ngô Thị Minh Trinh, Groi Kruanh UBND nkuăl Krông Pách, nŭih tâm rmôt ƀư nau trok tâm ntrơn neh bah nkuăl mbơh, tât nrôk aơ, nkual ƀư jêh geh bơi tât 2000 trích lục, geh 98% rnoh neh ân geh ntrơn, nchih moh săk 157/208 rnăk ndâk nau ntrơn gŭ mhê, pă 16,5 ha ƀư 3 nkuăl gŭ mhe tâm ăp xã Tân Tiến, Vụ Bổn ndrel Ea Knuêc. Tĭng wa Trinh, gay ƀư der nau kan kŏ kol âk tâm nau trok tâm gay ma ntrơn neh ƀư trong hăn ma rbăn rmen ta Dak Lak dôl mâp, nkuăl mra ƀư nau trok tâm ân tâm di, mbơh kloh, đăp mpăn nau dơi ân ƀon lan:

“Phung hên mra mbơh nau đah rmôt ƀư nau kan mbơh nchră, ƀư nau kơp uănh tât ăp blah neh, yơn mô di tĭng nkuăl mô lah nsum du xã nsum kơt nê jêh ri ƀư nau nchâp rnoh. Đah nau ƀư rjăp kơt nê, gâp mĭn nŭih ƀon lan mra tâm ban nau, yor păng tâm di. Mô dơi ân nơm yor ƀư nau kan aơ, nau kan êng, ăp nŭih ân geh ƀư ân kloh rvah, tâm ban nau geh jêng bah nŭih ƀon lan ndrel Ngih dak ndrel nsing tâm nuih n’hâm tĭng nau ntrŭnh bah pháp luật ân”.

Đah nuih n’hâm ndal, ngăch, ndăn tâm nau kan trok tâm gay ma ntrơn rklaih ntŭk mô êng tâm nkuăl Prông Pách, ŭch lah nau kan aơ mra geh ntơm leo ƀư tâm di nau ntrŭnh đă bah năp lơ 30/6 tât. Hôm trong hăn ngăch Buôn ma Thuột-Khánh Hoà ton mra nthoi nkuăl Tây Nguyên-Nam Trung Bộ, nthoi “bri” đah “dak lêng” mra ƀư jêh tâm di nau nchrăp kan, pơk trong nơih gay ma ntrŭt dăng hun hao văng sa, pâl n’aih, rgum nau ntuh kơl, kơl an nau ŭch nchuăn rdeng ngăch, đăp mpăn ân lam nkuăl./.