Nar 23/2, Ủy viên Bộ Chính trị, Bí thư Trung ương Đảng, Kruanh ban Nội chính Trung ương Phan Đình Trạc hŏ geh rơh pah kan đah Ban Thường vụ Tỉnh ủy Cao Bằng. Mbơh đah mpôl pah kan, kruanh rđău kan n'gor Cao Bằng an gĭt: năm 2022, rnoh ngăch hun hao bah n'gor geh tât 5,04%; rnoh rnăk ach o hŭch 4,29%; Nô nău njrăng n'gang neh dak, rnă njrăng, chính trị, đăp mpăn lam rêh jêng kon nuĭh ta n'gor dơi mât nâp; pah kan rdâk njêng Đảng n'hanh lam trong kan chính trị dơi rdâk ƀư nâp.

Năm 2023, n'gor Cao Bằng mbra n'hao dăng tay ăp trong droh rklaih jêr jŏt tâm nău kan ƀư njêng, tăch rgâl; ntrôl ngăch ƀư dơh glêh siƀŭt, nta trong soih aih an ntuh kơl tăch rgâl n'hanh rgum du đêt nău kan tơm khlay, trong nchrăp têh, tâm nê geh trong cao tốc Đồng Đăng - Trà Lĩnh...Kruanh ban Nội chính Trung ương Phan Đình Trạc dăn đă n'gor Cao Bằng ân geh trong nkra droh rklaih kô̆ yơn kol khan, lơn lah ăp kô̆ yơn mpeh ntung trong; uănh khlay săk blău tơm nuĭh kan; ntrôl ngăch n'gluh tơm prăk ntuh kơl n'hanh wăch rgum tay ntuh kơl, lơn lah ntuh kơl hun hao wăng sa mpông n'har bri, hun hao pâl nđaih, n'hao săk tam tay nău kan bah ăp nhih pah kan nội chính; ôp uănh, groi nđôi, ntrŭt ntrôl tĭng ƀư ăp quy định mpeh njrăng n'gang sa khâm; rêng nkra ăp rơh sa khâm, tih djơh; tĭng ƀư jăp pah kan rgâl dơh glêh tư pháp.