Nkhêp nkah ndray 68 năm Nar nai dak si Việt Nam, kêng măng 20/2, ta Hà Nội, Kruanh Ban Tuyên giáo Trung ương Nguyễn Trọng Nghĩa ndrel mpôl pah kan hăn tât khâl n'hanh mbah rhơn kruanh rđău kan, ndrel cán bộ viên chức bah Bộ Y tế.

Ta rơh pah kan, kruanh rđău kan Bộ Y tế lah rjăp, ăp  nău dơi tâm bôk nău kan nsum đah Ban Tuyên giáo Trung ương lvang năm 2021-2025. Tĭng nê, bar ding hŏ kan nsum mbơh ngăch nău lư, siƀŭt rgum nchih jru, lơn lah pah kan njrăng n'gang nuh srê COVID-19.

Nkoch trêng, rgŏ jă ntĭm nti nuĭh ƀon lan mât chăm, n'hao ngăch dăng n'hâm suan....Ntơh măt kruanh rđău kan Đảng, Ngih dak, Kruanh Ban Tuyên giáo Trung ương Nguyễn Trọng Nghĩa nchih nkah ăp nău  nsrôih, nău an têh kuâng bah n'gâng kan dak si n'hanh ăp nai dak si, y bác sỹ tâm bah ri aơ nơh. Nkre njuăl tât lĕ rngôch ăp oh nô nău mbah rhơn dŭt ŭeh lăng nkhêp nkah ndray 68 năm Nar nai dak si Việt Nam. Kruanh Ban Tuyên giáo Trung ương lah kloh, n'gâng kan tâm let năp tay mbra tâm rdâng đah mô đêt jêr jŏt, ntul rlong; dăn đă ăp gưl ủy Đảng, n'gâng kan an ŭanh khlay tâm di an n'gâng kan dak si n'hanh pah kan mât chăm n'hâm suan ƀon lan. Rong an ăp tơm ndơ tâm di gay rdâk njêng hun hao lam trong kan nhih dak si, ntŭk mât chăm n'hâm suan du trong geh nău dơi jŏ jong.