Ôi 12/12, ta Ntŭk Kruanh dak, Kruanh dak Võ Văn Thưởng mâp măt rmôt bơi 70 đại biểu nuĭh dơi nsing nơm ntoh lư, gĭt blău tâm ƀon lan rnoi mpôl đêt năm 2023. Ăp đại biểu ntoh măt bơi 500 nuĭh nsing nơm dơi săch bah ăp n’gor, nkual ƀon têh lam dak tât râng Bôk nău kan rnê rhơn, ntô̆ n’hao ntoh lư gĭt blău lah nuĭh dơi nsing nơm tâm ƀon lan rnoi mpôl đêt lam dak năm 2023. Ta nar mâp măt, âk nuĭh ntoh măt dơi nsing nơm ntoh lư mbơh an Kruanh dak n’hanh nkoch đă ăp đại biểu mpeh ăp nău kan ngăn ngên bah nơm ta ntŭk gŭ rêh, kơt:

nti ăp ntrong kan hun hao wăng sa n’hanh jêh nĕ nkoch trêng, ntop kơl, ntĭm nuĭh ƀon lan ta ntŭk, rgŏ jă nuĭh ƀon lan dŭt n’hao hao jŭt n’hŭch ach o, jŭt jăng nău rlŭk mâl, rgŏ jă ƀon lan ndâk njêng tâm rnglăp ntŭk gŭ rêh, ndâk njêng tâm rnglăp lam rnoi nuĭh.... Răm rhơn mâp măt ăp đại biểu nsing nơm ntoh lư, Kruanh dak Võ Văn Thưởng lah rjăp, Đảng, Ngih dak, uănh mĭn mro, an âk nău kơl mât uănh an ƀon lan rnoi nuĭh, tâm nĕ geh ăp bôk nău kan rƀŏng tĭng lam dak gay n’hao nău rêh bah ƀon lan rnoi mpôl đêt. Kruanh dak mpŏng ăp bu ranh ƀon, kruanh ƀon nkoch trêng tay, rgŏ jă nuĭh ƀon lan rnoi mpôl đêt mât rƀăy, ƀư uĕh nău khlay văn hóa, rgop nta an uĕh nsum bah âk ntil bah văn hóa Việt Nam.