Aơ lah rơh khâl bôk năp bah du hê kruanh n’gâng tơm Việt Nam tât Indonesia kơp bah jêh Đại hội Đảng 13 kơt bah rnôk srê Covid-19 ntoh. Lơn lah, aơ di rơh khâl gưl ngih dak bôk năp bah Kruanh dak Việt Nam tât Indonesia jêh 9 năm n’hanh tâm rnôk 2 dak rƀŏng tât nkah gĭt tŏng 10 năm ndâk njêng tâm boh Kan ndrel (2013-2023).

Tâm boh ăp ding Việt Nam n’hanh Indonesia lăp lvang mhe hun hao têh dăng

Đah ăp trong kan ndrel geh aƀaơ đah 2 dak, rơh khâl gưl Ngih dak tât Indonesia bah Kruanh dak Nguyễn Xuân Phúc geh nkô̆ khlay, rgop nâp nâl nsing nơm chính trị, ƀư jru lơn tay tâm boh kan ndrel âk ntil, ndơ̆ tâm boh ăp ding hăn lăp njoat mhe hun hao têh dăng.