Ôi nđaơ, (23/11), n’gor Long An ƀư nkah gĭt 60 năm lơh dơi Hiệp Hòa (23/11/1963-23/11/2023) n’hanh wơt dơn Huân chương Hồ Chí Minh. Kruanh dak Võ Văn Thưởng ndơn măt kruanh Đảng, Ngih dak râng ƀư nkah gĭt. Ta nar ƀư, ndơn măt kruanh Đảng, Ngih dak, Kruanh dak Võ Văn Thưởng lĕ an Huân chương Hồ Chí Minh an Đảng bộ, n’gâng kan ƀon lan n’hanh nuĭh ƀon lan n’gor Long An lĕ geh soan têh kuăng, lơn lah dŭt têh tâm nău kan cách mạng bah Đảng n’hanh rnoi nuĭh.

Ntoh ngơi ta nar ƀư, ndơn măt kruanh Đảng, Ngih dak, Kruanh Ban tuyên giáo Trung ương Nguyễn Trọng Nghĩa mbah rhơn n’hanh rnê âk săk rnglăy, nău geh têh ma Đảng bộ n’hanh nuĭh ƀon lan Long An lĕ mô rlu nsrôih gay dơi geh tâm năm bah năp. Jêh âk nar dâk rdâng lơh, nuĭh ƀon lan Long An lĕ rlet rlău ăp ntil roh, njê, ndrel ƀon lan lam dak lơh dăng ăp trong tâm lơh bah rlăng, lôch đah chiến dịch Hồ Chí Minh lịch sử năm 1975, rklaih đăp mpăn miền nam, kơp dơn neh dak, ƀư uĕh nău way ơm: trung dũng, kiên cường, lam ƀon lan lơh rlăng bah Đảng bộ n’hanh nuĭh ƀon lan Long An.