Ôi 31/7, ta Ntŭk Kruanh dak, Kruanh dak Tô Lâm ƀĭt joet rơh rƀŭn đah Ban ntĭm rđău Rgâl nkra tư pháp Trung ương gay uănh lah nu nău, săk rnglăy trong kan tâm năm bah năp; tâm ban ŭch trong rƀŏng, nău kan khlay tâm năm tât.

Ntoh ngơi ntĭm rđău ta Rơh rƀŭn, Kruanh dak nkoch kloh, rgâl nkra tư pháp lah ngoăy tâm âk nkô̆ nău khlay tâm trong rgâl mhe bah Đảng, gay rgop ndâk njêng n’hanh lôch uĕh Ngih dak pháp quyền XHCN Việt Nam, tŏng ăp ƀư tĭng nău way nău dơi Ngih dak lah tâm ban ŭch, geh nău tâm pă kloh rah wah, tâm rgop jăp, uănh nđôi săk rnglăy đah ăp ngih pah kan ngih dak tâm nău ƀư tĭng ăp quyền lập pháp, hành pháp n’hanh tư pháp, mât njrăng công lý, nău dơi kon nuĭh, nău dơi nuĭh ƀon lan, nău geh bah neh dak, rmôt kan n’hanh êng nuĭh. Tâm rnôk nĕ, trong kan tư pháp n’hanh rgâl nkra tư pháp an dơi ntrôl dăng, đah nău nsrôih chính trị têh, geh trong tâm di, mât uĕh dơi soan dăng rgum lĕ bah ăp gưl, ăp nău kan bah trung ương tât n’gor n’hanh lĕ kon nuĭh, nsrôih nău rƀŏng, nchrŏng trong lĕ dơi năl gay tâm di uĕh lơn nău ŭch, nău đă bah nu nău mhe.