Ôi nđaơ 25/7, Kruanh dak Tô Lâm lĕ wơt Kruanh Đảng Nhân dân Campuchia CPP, Kruanh Thượng viện Campuchia Hun Sen, Thủ tướng Hàn Quốc Han Duck Soo, Kruanh N’gâng kan Bộ cựu chiến binh n’hanh nuĭh geh soan Algeria Laid Rebiga, cố vấn rnă njrăng Ngih dak Ấn Độ Ajit Doval. Ta ăp rơh wơt, kruanh ăp dak nkoch nău yô̆ rngot hô ta năp nău roh bah Tổng Bí thư Nguyễn Phú Trọng, njuăl nău chop khâl n’hanh tâm pă nău rngot jru tât Kruanh dak Tô Lâm, Kruanh Đảng, Ngih dak n’hanh nuĭh ƀon lan Việt Nam.

Kruanh ăp dak ryơk đah nău kơl têh n’hanh ăp nău rgop khlay bah Tổng Bí thư Nguyễn Phú Trọng an nău hun hao tâm boh ăp ding đah Việt Nam n’hanh ăp dak; nsing nơm Kruanh dak Tô Lâm n’hanh Kruanh Việt Nam ndơ̆ neh dak Việt Nam hun hao tay, ndơn ăp drăp ndơ khlay ma Tổng Bí thư Nguyễn Phú Trọng lĕ n’glơi an. Kruanh dak Tô Lâm njuăl nău lah uĕh ngăn ngên tât Ngih dak, Chính phủ, Quốc hội, ƀon lan n’hanh kruanh ăp dak lĕ an âk nău rŏng têh đah Tổng Bí thư Nguyễn Phú Trọng, kơt hăn ndrel đah Kruanh n’hanh nuĭh ƀon lan Việt Nam tâm ăp mông nar rngot, hăn ndrel jru đah Việt Nam n’hanh ăp dak.