Lơ 30/7, ta Ntŭk Kruanh dak, Kruanh dak Tô Lâm wơt Groi Kruanh Ủy ban Châu Âu (EC), Ntoh măt gưl prêh bah Liên minh châu Âu mpeh nău kơl tâm rnglăp nchră nău bah dih n’hanh rnă njrăng, wa Josep Borrell Fontelles, dôl khâl na nê̆ Việt Nam.

Kruanh dak mĭn lah EU lah dak kan ndrel dŭt khlay bah Việt Nam; tâm ŭch gĭt saơ tâm boh đak Việt Nam đah EU năm bah năp hun hao uĕh, ƀư tă bah nău 2 ding n’hao tâm rgâl rmôt kan, tâm mâp gưl prêh; mbơh ƀư săk rnglăy âk tâm ton n’hanh trong ƀư kan ndrel, tâm nchră. Kruanh dak đă 2 ding ntrôl dăng tay tâm rgâl rmôt kan, ngăn lah gưl prêh; mbơh ƀư săk rnglăp Tâm on kan ndrel n’hanh kan ndrel lĕ rngôch Việt Nam-EU, Hiệp định EVFTA kơt ăp tâm ton, trong ƀư kan ndrel êng. Kruanh dak dăn đă EU ntrôl ăp dak kan ndrel ƀa ƀă ơm uănh di Hiệp định mât njrăng an ntuh kơl Việt Nam-EU; mât tay ODA an Việt Nam; n’hao kan ndrel mpeh rnă njrăng mạng, rnă njrăng dak lêng, njrăng n’gang trôk nar.