Rƀŏng tât nkah gĭt 79 năm Nar ndâk njêng Tahen ƀon lan Việt Nam (22/12), nar nđaơ (5/12), Kruanh dak Võ Văn Thưởng lĕ tât khâl n’hanh pah kan đah Bộ Tư lệnh Quân khu 5, ntŭk geh ntŭk kan dŭt khlay n’ăp mpeh chính trị, wăng sa, mât njrăng bri dak, rnă njrăng, tâm rnglăp nchră nău bah dih nkual miền Trung-Tây Nguyên. Ntoh ngơi ta nar pah kan, Kruanh dak Võ Văn Thưởng đă Quân khu mât uănh, wât jru Nghị quyết Trung ương 8 khóa 13 mpeh trong mât njrăng bri dak tâm nu nău mhe n’hanh ăp Nghị quyết bah Đảng mpeh mât njrăng bri dak, rnă njrăng.

An gĭt na nê̆, rblang, uănh lah n’hanh nchroh mbơh di na nê̆ nu nău, ngăn lah ăp nu nău geh tât mât njrăng bri dak, rnă njrăng ta nkual Quân khu, nsrôih mô an tât ndal, mâp ndal tâm ăp nu nău. Kruanh dak đă đŏng Quân khu mât ăp trong ƀư tiăr nti nchrăp rdâng lơh; Rgum n’hao uĕh tiăr nti, nti dăch nău ngăn; nsrôih n’hao săk rnglăy trong kan tâm rnglăp nchră nău bah dih mât njrăng bri dak, ndâk njêng trong n’har bri đăp mpăn, dăch dêh, đăp mpăn, hun hao n’hanh ƀư uĕh trong kan kơl Băl Lào, Campuchia.