Tâm rnôk hăn pah kan ta Hoa Kỳ, râng tâm nchră gưl têh APEC 2023, kêng măng 15/11, Kruanh dak Võ Văn Thưởng n’hanh I ur hŏ khâl rnăk Việt kiều Phạm Văn Tịch n’hanh mâp măt du đêt ƀon lan he gŭ dak bah dih. Wa Phạm Văn Tịch deh năm 1952 ta Quảng Nam, tâm du rnăk wâl rŏng dak. Bah jê̆,  păng hŏ  ơm kah rngăl n’hanh râng nău kan ntop kơl tahen. Năm 1967, tâm du rơh ntŭp bom, păng geh rmanh jru n’hanh ân koh lŭt bar ding jâng, lôch nê lap mâp du rmôt bác sỹ leo tât Hoa Kỳ săm.

Lah nuĭh geh nuih n’hâm rôih dăng, păng hŏ kơt nti, tốt nghiệp n’hanh hŏ jêng nuĭh rnâng kan mpeh n’gâng kan khoa học máy tính ta đại học Berkeley, California. Kruanh dak mpŏng lah ăp rơh kơn ƀon lan dak bah dih ntik n’hao tay nuih n’hâm rŏng dak, lor nchrăp nkoch mbơh nău lư gay nsum mpôl lam ƀon lan kônh wa ta Hoa Kỳ, gĭt kloh lơn mpeh nô nău neh dak n’hanh trong nchrăp tâm rnglăp lam rnoi nuĭh bah Đảng n’hanh Ngih dak he. Kruanh dak mpŏng nsum mpôl nuĭh Việt ta Hoa Kỳ mô rlu tâm rnglăp, tĭng jăp pháp luật n’hanh rgop uĕh tay tâm nău hun hao bah Hoa Kỳ, tâm boh bar ding bar dak, tâm ban kơt rơh mât njrăng, rdâk njêng n’hanh hun hao ƀon tơm Việt Nam.