Nkhêp di nkah gĭt 79 năm Nar ndâk njêng Tahen ƀon lan Việt Nam (22/12), Kruanh dak Võ Văn Thưởng lĕ tât khâl, uănh nđôi nchrăp tâm lơh bah Tahen đặc công ta Binh chủng Đặc Công. Mĭn lah lịch sử dôl ntô̆ n’hao bah Tahen Đặc công jêh 56 năm ndâk njêng, tâm lơh n’hanh têh jêng, Kruanh dak lah rjăp, rơh kơn cán bộ, tahen đặc công lĕ ndâk njêng ăp ntŭk tâm lơh dŭt uĕh, ndrel lam dak lôch uĕh nău kan njrăng n’gang rklaih đăp mpăn rnoi nuĭh, kơp dơn neh dak.

Tâm lvang aƀaơ, N’gâng kan mât njrăng bri dak ndâk njêng n’hanh hun hao ăp rmôt đặc công tĭng trong ngăch dơh, dăng; ƀư tĭng uĕh gưl nău kan chủ nhiệm đặc công-Ntŭk kan bôk nău kan njrăng n’gang rŭng răng lam tahen. Kruanh dak ntĭm rđău an ndâk njêng rmôt Đặc công Việt Nam dŭt ngăch mpeh chính trị; geh janh dăng chính trị nâp nâl, geh nuih n’hao têh; lah rmôt tâm lơh dơi nsing nơm ngăn, dŭt tĭng đah Đảng, Neh dak n’hanh nuĭh ƀon lan.