Bơi 8 mông măng 30/11, Kruanh dak Võ Văn Thưởng n’hanh I ur ndrel mpôl Đaị biểu gưl prêh Việt Nam lĕ sĭt tât tach ndeh păr quốc tế Nội Bài, Thủ đô Hà Nội, lôch uĕh rơh hăn khâl na nê̆ Nhật Bản bah lơ 27 tât 30/11 tĭng nău jă bah Ngih dak Nhật Bản. Tâm rơh khâl, Thủ tướng Nhật Bản Kishida Fumio n’hanh I ur ƀĭt joet ƀư wơt n’hanh sông sa Kruanh dak Võ Văn Thưởng n’hanh I ur.

2 nuĭh kruanh ndrel lĕ Mpôl đại biểu gưl prêh 2 dak rgum nchră, uănh lah ăp nău geh săk rnglăy tâm 50 năm ndâk njêng tâm boh tâm rnglăp n’hanh n’gluh an âk trong kan ndrel têh dăng lơn tâm năm tât. Jêh rgum nchră, 2 nuĭh kruanh ndrel mbơh nsum mpeh nău n’hao tâm boh Việt Nam-Nhật Bản hao kan ndrel lĕ rngôch yor đăp mpăn n’hanh uĕh lăng ta Châu Á n’hanh lam ntŭr neh; ndrel uănh nău ký ton ăp sam ƀŭt kan ndrel đah n’gâng kan, nău kan 2 dak.

Kruanh dak lĕ geh ăp rơh rgum ôp Kruanh Thượng viện, Kruanh Hạ viện Nhật Bản. Lơn lah, Kruanh dak lĕ tât khâl n’hanh ntoh ngơi nkoch nău kơl ta Quốc hội Nhật Bản, ngih pah kan ndâk njêng pháp luật geh lich sử jŏ năm ngăn ta châu Á...