Tâm mông nar rhơn nđơr rƀŏng tât nar Noel 2023 n’hanh mbah rhơn wơt năm mhe 2024, mhe aơ, Kruanh dak Võ Văn Thưởng hŏ tât khâl, mbah rhơn Tổng Giáo phận Huế. Kruanh dak ŭch rŏng, đah nău ƀư lah Tổng Giám mục Tổng Giáo phận Huế, Tổng Giám mục Giuse Nguyễn Chí Linh nchŏng leo, ntrŭt nsôr ƀon lan chroh bap ntik n’hao tay nuih n’hâm ryơk brah, rŏng dak.

Lah ta rơh mâp, Tổng Giám mục Giuse Nguyễn Chí Linh, Tổng Giám mục Tổng Giáo phận Huế lah uĕh n’hanh mpơl nău rhơn dơi wơt Kruanh dak n’hanh mpôl hăn khâl Tòa Tổng Giám mục Huế, mbah rhơn Noel kônh wa kon chroh Tổng Giáo phận Huế.

Tổng Giám mục Giuse Nguyễn Chí Linh rnê âk nău dơi rlău ăp rơh hăn pah kan dak bah dih bah Kruanh dak Võ Văn Thưởng tâm năm 2023; ntơh măt ngih dak Việt Nam mâp, pah kan đah kruanh âk dak têh; rgop khlay n’hao ntŭk gŭ kan têh Việt Nam ta ntŭk kan lam ntŭr neh.  

“Êng đah ƀon lan chroh bap Việt Nam, hăn khâl Vatican n’hanh mâp Đức Giáo hoàng Francis bah Kruanh dak Võ Văn Thưởng lah ngoăy tâm ăp nău mpŏng n’hanh ton mpơl uĕh. Lơn lah, ƀon lan chroh bap ta Huế nơm geh hăn khâl  dja nar lơn  ma rhơn rnôk khân păng mĭn lah mbra geh du nar nê nơh mbra dơi wơt Đức Giáo hoàng Francis ta Linh địa La Vang. Đah săk gâp nơm, rlău ma nău rhơn mhe nkoch bah lơ nê, gâp dŭt di nuih n’hâm mpeh nău tâm boh đah ăp mpôl kan dơi kan tâm ƀon lan chroh bap ăp tơ̆ du nău răm mƀak, nar lơn ma lăp rgum, nar lơn ma dêh bên”.

Rhơn tât khâl Tòa Tổng Giám mục Huế tâm mông nar dăch kêng noel, Kruanh dak Võ Văn Thưởng njuăl nău uĕh lăng bah kruanh rđău kan Đảng, Ngih dak tât Tổng Giám mục Giuse Nguyễn Chí Linh, Tổng Giám mục Tổng Giáo phận Huế; ăp nuĭh linh mục, tu sỹ n’hanh kônh wa kon chroh Tổng Giáo phận Huế wơt du khay Noel uĕh lăng; du năm mhe, đăp mpăn rhơn răm.

Nău lư mpeh nô nău neh dak ,  Kruanh dak an gĭt, năm 2023 neh dak hŏ geh âk nău dơi ngăn dơi băl mpôl dak bah dih rnê âk, tâm nê geh nău rgop khlay bah ƀon lan chroh bap lam dak. Đah trong rƀŏng “Rêh mpơl nău uĕh lăng tâm nuih n’hâm rnoi nuĭh gay rhŏ dŏng an nău rhơn mƀak bah ƀon lan", ƀon lan chroh bap hŏ nsrôih râng ăp trong leo tâm rlong rŏng dak tă bah MTTQ Việt Nam n’hanh ăp mpôl kan nsum mpôl rgŏ jă; lơn lah pah kan ntop kơl rêh jêng kon nuĭh, kơl êng nuĭh, dak si, ntĭm nti, geh nuih n’hâm tâm rŏng, rhŏ dŏng tât ƀon lan lơn lah rmôt nuĭh mô geh nău lap tâm nău rêh kơt: kon se ach o, mô geh ntŭk nsing nde; nuĭh ndrô ranh, nuĭh geh nău ji jreh njroi ji HIV/AIDS,...  

Kruanh dak Võ Văn Thưởng hŏ ký siƀŭt jă Đức Giáo hoàng Francis tât khâl Việt Nam; ŭch rŏng nsum mpôl chroh bap Việt Nam ndrel kan nsum đah ăp nhih pah kan ngih dak ơm geh rnôk dơi wơt Đức Giáo hoàng tât khâl.

“Gâp nkah tâm siƀŭt bah Đức Giáo Hoàng Francis njuăl ƀon lan chroh bap Việt Nam lôch gâp hăn khâl tât Tòa Thánh, ôp srĭng nău Đức Giáo Hoàng, geh du nău lah, nuih n’hâm rŏng brah n’hanh nuih n’hâm rŏng kon nuĭh lah bar măt bah du lha prăk. N’hanh gâp hŏ nkah tâm Kinh Thánh geh nău lah rhŏ dŏng ƀon lan he lah du trong gay ryơk brah đŏng. Gâp saơ ƀon lan chroh bap bah Tổng giáo phận Huế tâm bah ri aơ hŏ tĭng ƀư dŭt jăp nău dơn kan ryơk brah, rŏng ƀon lan, bah nê rgop ntrŭt ntrôl nău hun hao wăng sa rêh jêng kon nuĭh bah nkual, neh dak, rgop ƀư an nău rêh bah nuĭh ƀon lan nar lơn ma uĕh lơn”. 

Kruanh dak Võ Văn Thưởng nkoch kloh, ta tâm nchră tâl pham, Ban Chấp hành Trung ương hŏ n’gluh an dŏng Nghị quyết mpeh ntik n’hao tay nău way ơm,  suan dăng tâm rnglăp lam rnoi nuĭh, rdâk njêng neh dak he nar lơn ma têh ndrŏng, răm mƀak. Nghị quyết lah rjăp, tâm rnglăp lam rnoi nuĭh lah nău way ơm khlay bah rnoi nuĭh Việt Nam; lah gung trong têh jong khlay rloh rlău bah Đảng, lah tu tơm suan dăng bah rnoi nuĭh. Kruanh dak an lah, ŭch kơt nê ân geh nău  tâm rnglăp ƀon lan, tâm rnglăp đah nuĭh chroh rƀŭn n’hanh nuĭh mô tĭng chroh rƀŭn, đah nuĭh tĭng chroh dja đah nuĭh tĭng chroh êng; tâm rnglăp đah nuĭh Việt Nam tâm dak n’hanh nuĭh Việt Nam ta dak bah dih. Ta nuih n’hâm nê, Kruanh dak ŭch rŏng, đah nău ƀư lah Tổng Giám mục Tổng Giáo phận Huế, Tổng Giám mục Giuse Nguyễn Chí Linh mbra têk ndrêng, rgŏ jă, ntrŭt nsôr ƀon lan chroh bap Giáo phận Huế ntô̆  n’hao uĕh tay nuih n’hâm ryơk brah, rŏng dak; rŏng brah n’hanh rŏng ƀon lan gay nar lơn ma geh âk lơn ăp nău kan chroh uĕh rêh uĕh; ndrel nsum ti rdâk njêng neh dak nar lơn ma têh ndrŏng n’hanh hơm răm./.