Nkhêp geh khai giảng năm nti mhe 2023-2024, Kruanh dak Võ Văn Thưởng mhe geh siƀŭt njuăl n’gâng kan ntĭm nti. Tâm siƀŭt njuăl, Kruanh dak lah rjăp: “Đảng, Ngih dak he way ntrŏng n’gâng kan ntĭm nti lah trong kan khlay lor bôk năp bah neh dak. Ntĭm nti, tiăr nti, ăp kon se lah nău dơn kan nsum bah nhih nti- rnăk wâl n’hanh rêh jêng kon nuĭh. Du dak ŭch hun hao ân geh jâng ntĭm nti săk blău n’hanh ntuh kơl an ntĭm nti lah ntuh kơl an hun hao jŏ jong.

 Gâp ŭch rŏng ăp nai ntĭm nti ân way mât nău rŏng, lĕ nuih n’hâm đah nău kan, han săk rlău dơi ăp jêr jŏt, rgop âk lơn đŏng an n’gâng kan tăm nuĭh têh khlay. Gâp ŭch rŏng ăp me bơ̆, yor ma nău rêh let năp tay an oh kon he, ân ndrel hăn đah nhih nti n’hanh lam rêh jêng kon nuĭh tâm trong ntĭm nti, mât chăm an ăp oh kon. Gâp  dăn đă ăp gưl ủy, mpôl kan đảng, n’gâng kan ta ntŭk mât chăm lơn đŏng an n’gâng kan ntĭm nti ma ăp trong n’glêh an năn ngăch n’hanh di, rdâk njêng an dơi ntŭk gŭ rêh ntĭm nti kloh uĕh ngăn, srăch se, rsang rnglăy, đăp mpăn, gay ăp nai  ntĭm nti n’hanh ăp kon se nti, sinh viên dơi ntĭm nti n’hanh kơt nti tâm nău rhơn nđơr, dơi ntĭk lĕ nău dơi blău mhe, rgop khlay tĭng ƀư geh nău dơi rgâl mhe tơm n’hanh lam lĕ rngôch ntĭm nti dak he”.