Ôi 5/9, ăp ntŭk lam dak, kon hŏk n’gŭr răm tât ngih sam ƀŭt râng ntơm ƀư năm nti. Rlău 32 rkeh kon hŏk ta lam dak lĕ na nê̆ ntơm lăp năm nti mhe 2023-3024. Ta nkual tây Nguyên, bơi 1 rkeh 400 rbăn kon hŏk ăp gưl răm m’ak tât ngih sam ƀŭt ntơm năm nti mhe. Tâm nĕ, n’gor Dak Lak geh 500 rbăn kon hŏk, Gia Lai geh 368 rbăn kon hŏk, Lâm Đồng geh 334 rbăn kon hŏk, Dak Nông geh 185 rbăn kon hŏk n’hanh Kon Tum geh 166 rbăn kon hŏk. Lơn lah, nai n’hanh kon hŏk Ngih sam ƀŭt Phổ thông Dân tộc nội trú n’gor Gia Lai lăp wơt Kruanh dak Võ Văn Thưởng tât râng ntơm ƀư năm nti.

Kruanh dak mĭn lah: “Bah ngih sam ƀŭt aơ, hàng rbăn kon hŏk oh kon rnoi mpôl đêt Bahnar, Jrai, Thái, Nùng, Tày, Êđê, Xơ Đăng.... lĕ têh jêng, rgop nuĭh kan uĕh rhŏ an nău kan hun hao wăng sa-rêh jêng, đăp mpăn mât njrăng neh dak, rnă njrăng bah n’gor nơm. Tâm nĕ, âk kon hŏk bah ngih sam ƀŭt lĕ jêng cán bộ kruanh ăp gưl tâm n’gor.

Di rơh aơ, Kruanh N’gâng kan ntĭm nti Nguyễn Kim Sơn lĕ geh nar pah kan đah N’gâng kan ntĭm nti n’gor Gia Lai. Ta aơ, wa Nguyễn Kim Sơn đă nău kan ntĭm nti n’gor uănh mĭn đah nău rgâl ntĭm nti, uănh khlay, nta nơih an rmôt cán bộ nai bah n’gor đăp mpăn, nsing nơm ntĭm nti bôk nău ntĭm nti phổ thông mhe.

Ôi lơ 5/9,wa Nguyễn Trọng Nghĩa, kruanh rnâng kan Tuyên giáo Trung ương lĕ râng rơh sa nkra geh nău dơi n’hoch dak kloh ta cù lao Tân Phú Đông, n’gor Tiền Giang. Wa Nguyễn Trọng Nghĩa nkah đah cán bộ, nai nti n’hanh kon hoc Tiền Giang lah nsum n’hanh ngih nti THCS Tân Phú lah êng an geh n’hao prêh nău kan ntĭm n’hanh nti, ntop ta nău kan nti kon nuĭh, nti nuĭh blău an neh dak. Ăp gâl yủ Đảng, n’gâng kan ta ntŭk an geh gĭt nău mĭn, nău ntrŭnh mpeh ntĭm nti bâh Đảng, ngih dak, n’hanh nău ntĭm nti bâh wa Hồ, an geh mât uănh, nta nău dơh nơih ueh an nău kan ntĭm nti, an geh tâm rgop ntĭm nti văn hóa đah ntĭm nti nău rŏng dak.