Nar 16/11, hŏ ƀư rơh Tâm dâl nău đah ăp kruanh rđău kan jâng wăng sa APEC đah ăp năch jă lah Tổng thống Colombia Gustavo Petro, Thủ tướng Fiji Sitiveni Rabuka n’hanh Bộ trưởng Bộ Công Thương Ấn Độ Shri Piyush Goyal. Lah kruanh rđău kan ăp jâng wăng sa lor bôk năp bah APEC lah ta rơh tâm nchră, kruanh dak Võ Văn Thưởng lah rjăp rgâl trôk nar lah nkô̆ nău jăch ndăn lam ntŭr neh, ân geh nău nsrôih, nău dơn kan chính trị tâm ban kơt nău tâm rnglăp bah lĕ rngôch ăp jâng wăng sa.

Kruanh dak tâm nkoch nău mĭn bah Việt Nam uănh rdâng lơh đah rgâl trôk nar lah trong n’glêh an lor tâm hun hao neh dak n’hanh ton lah rjăp mpeh tât bah hôm n’gluh n’huk djơh tâm năm 2050, hŭch bah mê-tan, mât njrăng bri n’hanh rgâl ŭnh nar. Kruanh dak dăn đă APEC n’hanh ăp dak băl tâm boh ntrŭt ntrôl dăng bôk nău kan tâm boh mpeh ŭnh nar sĭt jêng tay n’hanh ƀư kloh uĕh ăp công nghiệp; hun hao tuch tăm âk ndơ gŭ rêh n’hanh sĭt jêng tay ndơ mpêt khlay; đăp mpăn lam rêh jêng kon nuĭh n’hanh ndơ̆ rgâl geh nău tâm ban./.