Ôi 30/8, ta Nhih pah kan kruanh dak, Kruanh dak Võ Văn Thưởng wơt Đại sứ Kazakhstan Yerlan Baizhanov, tât ntĭnh sĭt lĕ năm kan ta Việt Nam. Ta rơh wơt, Đại sứ Yerlan Baizhanov nkoch nău tâm rŏng krêp dêh jru mpeh neh dak n’hanh kon nuĭh Việt Nam; nkre an gĭt, tâm năm kan, hŏ dơn geh âk nău ntop kơl, kan nsum uĕh bah Bộ Ngoại giao n’hanh ăp nhih pah kan dơi kan bah Việt Nam. 

Kruanh dak lah rjăp, Việt Nam n’hanh Kazakhstan geh âk nău tâm ban mpeh lịch sử, văn hóa; ndrel rlău âk mông nar krit jêr yor n’gâng kan rlăch ndăng nsĭt tay nău đăp mpăn bah ăp dak ntơm nơh n’hanh aƀaơ, bar dak lah ăp nuĭh băl uĕh nsum. Kruanh  dak nsing nơm đah nău tâm gĭt wât jru hvi mpeh văn hóa, neh dak, kon nuĭh Việt Nam, ta moh ntŭk gŭ hao kan, Đại sứ Yerlan Baizhanov mbra dêh rŏng tay Việt Nam, way lah nuĭh băl bên, mô rlu rgop n’hanh bun dăp tâm boh tâm rnglăp way ơm đah Việt Nam n’hanh Kazakhstan.