Kêng măng 6/9, ta Nhih pah kan kruanh dak, Kruanh dak Võ Văn Thưởng wơt Kruanh Thượng viện Nhật Bản Otsuji Hidehisa dôl geh trong hăn khâl ngăn Việt Nam. Kruanh dak Võ Văn Thưởng mpơl nău rhơn  mpeh nău dơi tâm boh bar dak tâm bah ri aơ đah nău nsing nơm nar lơn ma dơi n’hao dăng, njêng jâng ntơm an ăp nău kan tâm boh bar ding.

Tâm trong kan wăng sa, Kruanh dak Võ Văn Thưởng an lah, Nhật Bản lah dak tâm  boh khlay dâk bôk năp bah Việt Nam. Nsing tâm nău dơi tâm boh 50 năm aơ, Kruanh dak Võ Văn Thưởng dăn đă bar dak ntrŭt ntrôl tay nău kan tâm khâl nsum mpôl kan gưl têh, tâm nchră gay n’hao dăng tâm boh bar dak tâm let năp tay; ntrŭt ntrôl tay tâm boh bar dak tâm ăp trong kan wăng sa, tăch rgâl, ntuh kơl, ntĭm nti, khoa học công nghệ, văn hóa…