Bah năp năm nti mhe, Rmôt kan bah N’gâng kan ntĭm nti yor Kruanh n’gâng kan Nguyễn Kim Sơn leo bok hŏ geh nau kan hăn mêt uănh nau kan nchrăp năm nti mhe ndrel pă nklâm ndơ ân kon se nkuăl jru n’gor Dak Nông. Gay ntrŭnh ân săk tam tâm năm nti mhe 2023-2024, Kruanh n’gâng kan Nguyễn Kim Sơn đă n’gor Dak Nông rđau ndrel ƀư ueh nau kan kơt: kơl an, ntuh kơl âk lơn tay ân nau kan ntĭm nti tâm nkual jru, ngai, nkuăl rnoi mpôl đê̆, nsôih ƀư ueh nau săch nai ntĭm kon se gay tŏng nroh nŭih, nau kan, n’hao nau nchrăp ngih vâl, ndơ dŏng ân ngih săm ƀŭt, ntrŭt ăng nau lăp kơl an ân nau kan ntĭm nti, dŏng ân geh săk tam nau dơi kan ndrel ma nau rgâl mhe, dŏng ndrel hun hao rjăp khoa học, công nghệ, rgum ƀư ân săk tam nau ƀư nau kan ntĭm nti phổ thông mhe tĭng nau ntrŭnh:

“Năm nti mhe tât lah du năm mhe geh nau khlay, tơm ngăn bah nau kan rgala mhe bôk nau ntĭm nti phổ thông. Nau kan têh lơn rđil đah ăp năm bah năp nê, ndri ma hŏ rgum ri rgum lơn, hŏ nsôih ri ân nsôih lơn. Gay rƀŏng tât nau tă geh dăch dŭt tâm năm 2025 ƀư jêh nau kan ntrơn rgâl tĭng nau ntĭm nti mhe ndrel nchrăp nau tong gay ma ntrŭnh ƀư nau kan ntĭm nti mhe đah gưl mầm non”.

Di rnôk hăn mêt uănh năm nti mhe, Kruanh n’gâng kan ntĭm nti Nguyễn Kim sơn hŏ hăn ôp khâl, bonh đă, pă 2 mlâm tivi, 100 ndeh vah jâng ân nai ntĭm ndrel kon se nti ngih săm ƀŭt Hoàng Văn Thụ ndrel Ngih săm ƀŭt Nơ Trang Lơng, xã nkual jru, ngai bah nkuăl Dak Glong./.