Nău mbơh tơih bâh nuĭh leo kan n’gor Ủy n’hanh UBND n’gor Kon Tum an saơ, Kon Tum geh lĕ rnoh neh tuch tăm rlău 902.000ha, dŭt nkah ngăn lah geh tât bơi tât 170 rbăn ha neh tăm bri ê hŏ geh bri. N’gor uănh năl tâm nău pah kan jan sa tuch tăm hun hao wăng sa tăm tơm dak si lah nău kan tơm.

Aƀaơ, lam n’gor geh rlău 6.800ha tơm ƀư dak si, tâm nĕ rnoh neh tơm sâm Ngọc Linh lah rlău 1.700ha. Tâm rnôk hun hao tuch tăm, tăm bri n’gor Kon Tum dôl mâp âk nău kŏ văk, kơt nău rgâl nkô̆ mpŏng kan dŏng bri, ê hŏ geh nău ntrŭnh an manh neh bri mât dŏng n’hanh bri mât njrăng gay ma hun hao nău wăng sa ba dâng n’hâm bri, nău kơl kan hun hao tăm bri ê hŏ tâm di geh nău kan ngăn...Tĭng nău mbơh bâh kruanh n’gâng kan Lê Minh Hoan, đah ăp nău kŏ băl geh tât nău way kan, n’gor Kon Tum n’hanh kruanh n’gâng kan tuch tăm an geh ƀư răng dăng, nsrôih ƀư tĭng der geh nău nklơi jăng n’gul trong roh nău dơi hun hao. Kruanh n’gâng kan an lah, Kon Tum geh njoat hăn bôk năp lĕ geh trong hăn di mpeh hun hao tuch tăm mât bri, yơn an geh rgum nău khlăy pah kan jan sa đah nău khlăy mpeh nkret njêng, nău pâl rlưn, tăch rgâl, ntŭk tăch rgâl. Kruanh n’gâng kan lah na nê̆, n’gâng kan tuch tăm n’hanh hun hao ƀon lan mbra geh tâm rgop tay, kơl tay n’gor Kon Tum tâm nău mbơh tơih, kuăl jă, mbơh nău kan ntuh kơl ta trong kan tuch tăm bâh n’gor tâm let năp tay.