Nthoi tay rơh hop tâl 36, ôi ntri (21/8), ta Jay Quốc hội, ta nâm nău ƀư tơm bah Kruanh Quốc hội Trần Thanh Mẫn, Ủy ban Thường vụ Quốc hội ƀư ôp rkhêl n’hanh ơh nău ôp rkhêl nău tĭng ƀư ăp nghị quyết bah Ủy ban TVQH mpeh groi nđôi way nkô̆ n’hanh ôp rkhêl ntơm bah bôk năm kan Quốc hội Khóa 15 tât lĕ năm 2023.

Lah ta rơh ôp rkhêl, Kruanh Quốc hội Trần Thanh Mẫn an gĭt: Aơ lah lor bôk năp tâm năm kan Quốc hội khóa 15, Ủy ban Thường vụ Quốc hội an ƀư nău kan “groi nđôi tay”, mpơl nău dơn kan bah Ủy ban Thường vụ Quốc hội tâm nău groi nđôi tât dŭt nău tĭng ƀư nău đă, nău dăn bah Quốc hội, Ủy ban Thường vụ Quốc hội. Bah nê, uănh năl tay lam lĕ rngôch, ƀư kloh ăp nău jêr jŏt, kŏ kol tâm rnôk tĭng ƀư, droh rklaih jêr jŏt, n’hao têh lơn đŏng nău dơn kan bah ăp nhih pah kan geh nău groi nđôi. Kruanh Quốc hội nsing nơm ăp Đại biểu Quốc hội đah bôk rngok đăng hăr, nuih n’hâm tâm rgop, nsŏng trong an Chính phủ, ăp Bộ trưởng, Kruanh n’gâng kan tâm nău rđău đă, ƀĭt juet, nkra bah ăp mpăng đêt, nkra ăp jêr jŏt, kŏ kol. Ăp nuĭh kan tâm Chính phủ, ăp kruanh n’gâng kan mpơl tay nuih n’hâm dơn kan, nsrôih dŭt âk, ơh sŏng dăng, di rgum tơm, ndơ̆ luh nău  dơn kan, trong nkra tĭng ƀư geh nău dơi rnoh tât kan, nău dơn kan bah Quốc hội, Chính phủ n’gluh bah năm 2024 n’hanh Nghị quyết Đại hội tâl 13 bah Đảng.