Kêng măng 22/8, Kruanh Quốc hội Trần Thanh Mẫn wơt Kruanh Quốc hội dak Cộng hòa Dân chủ Nhân dân Lào-wa Sommad Pholsena dôl geh rơh khâl n’hanh pah kan ta Việt Nam. Kruanh Quốc hội Trần Thanh Mẫn mĭn lah Việt Nam uănh khlay n’hanh an lor bôk năp nău tâm boh dăch dêh têh, tâm rnglăp n’hanh kan ndrel lĕ rngôch đah Đảng, Ngih dak n’hanh nuĭh ƀon lan Lào.

Tâm năm tât, Kruanh Quốc hội đă 2 dak n’hao tâm rgâl mpôl gưl têh, ăp gưl; tâm rgop rjăp, ntop kơl ndrel ta ăp trong ƀư, rƀŭn nchră ăp ding tâm nkual n’hanh ta lam ntŭr neh. Ăp rmôt kan nsum mpôl nuĭh ƀon lan 2 dak, n’gâng tơm lah Liên hiệp ăp rmôt kan dăch dêh Việt Nam n’hanh Ủy ban Hòa bình Việt Nam, Ủy ban Hòa bình n’hanh Đoàn kết Lào tâm rgop rjăp lơn tay, ƀư âk nău kan ntĭm nti chính trị, nău mĭn, lơn lah an rơh druh ndăm mpeh lịch sử, way ơm, nău tâm rnglăp dăch dêh têh Việt Nam-Lào.