Kêng măng 27/12, ta Jay Quốc hội, Kruanh Quốc hội Vương Đình Huệ mâp măt ăp nhih pah kan báo chí nkhêp geh năm mhe Giáp Thìn n’hanh râng Lễ sơch ăp nar kan khlay ntoh lư bah Quốc hội Việt Nam năm 2023. Lah ta rơh mâp măt, Kruanh Quốc hội Vương Đình Huệ lah rjăp, năm 2023, tâm ăp nău dơi nsum bah Quốc hội, way geh nău ndrel hăn n’hanh rgop khlay bah ăp nhih pah kan thông tấn báo chí.

Ăp nhih pah kan báo chí way lor nchrăp, nsrôih nđơn nkoch trêng tay ăp tŏng, năn ngăch, ngăn ngăn ăp nău kan bah Quốc hội tât cử tri n’hanh ƀon lan lam dak; rgop n’hao nău gĭt êng n’hanh ŭch tĭng kơl bah ƀon lan đah ăp nău n’glêh an bah Quốc hội; ndơ̆ ăp luật, pháp lệnh, nghị quyết bah Quốc hội, Ủy ban Thường vụ Quốc hội ơm lăp tâm nău rêh. Báo chí hŏ nkoch trêng năn ngăch ăp nău mĭn, nău ŭch rŏng bah ăp n’gâng kan, ăp nuĭh bah cử tri, ƀon lan tât rơh rgum nchră Quốc hội n’hanh lah trong nkoch trêng nău lư nsing nơm gay ƀon lan groi nđôi Quốc hội, ăp nuĭh biểu Quốc hội, geh nău tâm dâl bar ding, Kruanh Quốc hội njrăng đă, kruanh rđău kan n’hanh mât bôk lam trong kan báo chí n’hao tay han săk chính trị; uănh khlay kơi năp nti n’hao lĕ rngôch săk blău rmôt kan phóng viên, biên tập viên tâm ban đah nău dơn kan dơi jao, rƀŏng tât nkah ndray 100 năm Nar báo chí cách mạng Việt Nam (21/6/1925 - 21/6/2025).