Nkhêp nkah ndray 113 năm Nar bu ur lam ntŭr neh n'hanh 40 năm Nar njêng Hội Bu ur Bộ Công an, kêng măng 6/3, ta Jay Quốc hội, Kruanh Quốc hội Vương Đình Huệ hŏ geh rơh mâp Mpôl đại biểu bu ur công an ƀon lan.

Ta rơh mâp, Kruanh Quốc hội Vương Đình Huệ lah rjăp, 40 năm aơ, Hội bu ur Bộ Công an mô rlu hun hao mpeh ăp ntil, bah rêng mât bôk  kan, nău way tĭng trong kan tât rnoh âk hội viên n'hanh săk  blău kan n'hanh hun hao ăp trong leo ƀư bah bu ur. Hội nkre lah ntŭk gay tĭng hội viên tiăr nti, năl di săk nơm, nkre lah suan ntrôl gay oh yuh nsrôih an lĕ nău gĭt blău n'hanh mô rlu rgâl mhe, ma ăp trong leo ƀư mô dơn ƀư dơi nău n'gloh ang tâm nău rêh, ma hôm an nkah tay nău uĕh lăng, jru hvi mpeh rup gui nuĭh bu ur Công an ƀon lan: Kơt trong ƀư "Pe jăp", Trong leo "Bu ur Công an ngăch prăl nău kan ngih dak, đăp dêh nău kan rnăk wâl"...

Ntơm bah ăp trong leo ƀư nê, ntoh âk bu ur Công an han săk, âk oh yuh jêng nuĭh rnâng kan, nuĭh khoa học jăp blău, geh nsing nơm tâm n'gâng kan n'hanh lam rêh jêng kon nuĭh; rnoh âk bu ur cán bộ dơi n'hao ƀư kruanh rđău kan nar lơn ma âk. Kruanh Quốc hội an lah, ta năp nău ŭch geh hun hao mhe bah neh dak, Đảng, Ngih dak he nar lơn ma uănh khlay, hun hao lĕ rngôch n'hanh jru hvi đah bu ur dak he, na nê̆ lah pah kan rgŏ jă bu ur, yor nău ŭch geh nău tâm ban, rhơn răm n'hanh rgâl mhe bu ur. Kruanh Quốc hội đă, cán bộ, hội viên bu ur Công an ƀon lan nsrôih tiăr nti, ngăch prăl tâm nău kan, ƀư bah ăp jêr jŏt, mpăng đêt tă bah săk mha êng bah bu ur.